सुर्खेत । नेपाली कांग्रेसका कार्यवाहक सभापति पूर्णबहादुर खड्काको गृह जिल्ला सुर्खेतबाट एक जना केन्द्रीय सदस्यसहित करिब एक दर्जन नेता, कार्यकर्ताहरू विशेष महाधिवेशनको पक्षमा खुलेका छन् । केन्द्रीय सदस्य जानकी सिंह लगायतका नेताहरू विशेष महाधिवेशनको पक्षमा खुलेका हुन् ।
कर्णाली प्रदेशसभाकी सांसद समेत रहेकी सिंहले ०७९ को चुनावपछि खड्काको टिम छाडेको चर्चा थियो । यद्यपि, भावी सभापतिको लाइनमा रहेका खड्काको गृह जिल्लामै सिंह लगायतका नेताहरू विशेष महाधिवेशनमा सहभागी हुनुलाई खड्काले पार्टीभित्र नेताहरूलाई मिलाउन नसकेको टिप्पणी सुरु भएको छ ।
सिंहसहित तीर्थजंग शाही, कालीप्रसाद शाक्य, धना विष्ट, कर्ण चन्द, पूर्ण राना लगायतका ९ जना महाधिवेशन प्रतिनिधिहरू विशेष महाधिवेशनमा पुगेका छन् । यस्तै, कांग्रेस सुर्खेतका पूर्व जिल्ला सभापति लगायतका अन्य केही नेताहरू पनि काठमाडौँमा सहभागी छन् ।
यस्तै केही प्रतिनिधिहरूले हस्ताक्षर गर्न बाँकी रहेकाले महाधिवेशन प्रतिनिधिहरू बढ्ने सम्भावना रहेको पूर्व सभापति कमलराज रेग्मीले बताए ।
दुई वटा निर्वाचन क्षेत्र रहेको सुर्खेतमा ५० बढी महाधिवेशन प्रतिनिधिहरू छन् । कर्णालीमा इतर पक्षको नेतृत्व गरिरहेका हृदयराम थानीले भने अहिलेसम्म कुनै निर्णय गर्न सकेका छैनन् ।
