पेरिस । फ्रान्सेली साइबर अपराध अनुसन्धान इकाईले मंगलबार पेरिसस्थित अमेरिकी खर्बपति व्यापारी एलन मस्कको माइक्रोब्लगिङ वेबसाइट एक्सको कार्यालयमा छापा मारेको छ । यो छापा कम्पनी र यसको एआई च्याटबोट ग्रोक्रसम्बन्धी फराकिलो अनुसन्धानको हिस्सा रहेको पेरिस अभियोजन कार्यालयले जनाएको छ ।
अभियोजक लोर बेक्युका अनुसार, अनुसन्धान सुरुमा एक्सको एल्गोरिदम दुरुपयोगमा केन्द्रित थियो । तर अहिले यौनजन्य डीपफेक, बाल यौन शोषणयुुक्त सामग्रीको सम्भावित प्रसार र होलोकस्ट अस्वीकार गर्ने सामग्रीसम्ममा विस्तार गरिएको बताइएको छ । मस्क र एक्सकी पूर्व सीईओ लिन्डा याकारिनोलाई अप्रिलमा बयान दिन बोलाइएको छ । कम्पनीका कर्मचारीहरूलाई साक्षीका रूपमा सोधपुछ गरिनेछ ।
एक्सले छापालाई निराधार र राजनीतिबाट प्रेरित कदम भन्दै कडा आलोचना गरेको छ । आफूले कुनै कानुन उल्लंघन नगरेको दाबी गर्दै कम्पनीले आफ्नो कार्यालयमा छापेमारीलाई कानुन प्रवर्तनको नाटकीय दुरुपयोग भनेको छ । मस्कले पनि यसलाई राजनीतिक आक्रमण भनेका छन् ।
यसैबीच, युरोपेली आयोगले गत साता ग्रोक्रमाथि छुट्टै छानबिन सुरु गरेको छ । ग्रोक्रले प्रयोगकर्ताको आग्रहमा महिलाहरू र बालबालिकासमेत समावेश भएका यौनजन्य डीपफेक तस्बिरहरू ठुलो मात्रामा उत्पादन गरेको आरोपका बीच टूलको व्यापक आलोचना भइरहँदा यो कदम आएको हो ।
