काठमाडौ । प्रधानमन्त्रीको शपथ ग्रहणको मिति नजिकिँदै जाँदा राष्ट्रिय स्वतन्त्र पार्टी (रास्वपा) भित्र सरकार गठनको तयारी तीव्र भएको छ । सम्भावित मन्त्रीहरूको चयन र मन्त्रिपरिषद् संरचनाबारे शीर्ष नेताहरूबीच आन्तरिक छलफल सुरु भएको छ ।
पार्टी सभापति रवि लामिछाने र वरिष्ठ नेता बालेन शाहबीच मन्त्री छनोटका विषयमा अनौपचारिक संवाद भइरहेको स्रोतले जनाएको छ । आगामी बिहीबार (चैत १२ गते) नवनिर्वाचित सांसदहरूको शपथ ग्रहण गराउने तयारी संसद सचिवालयले गरिरहेको छ भने त्यसलगत्तै रास्वपाले संसदीय दलको बैठक राख्ने तयारी गरेको छ ।
दलको बैठकले बालेन शाहलाई संसदीय दलको नेता चयन गर्ने सम्भावना रहेको छ । संविधानअनुसार बहुमत प्राप्त दलको नेतालाई राष्ट्रपतिले प्रधानमन्त्री नियुक्त गर्ने व्यवस्था रहेकाले दलको नेता चयनसँगै सरकार गठनको प्रक्रिया अघि बढ्नेछ ।
रास्वपाले चैत १३ गते प्रधानमन्त्रीको शपथ गराउने तयारी गरेको छ । पार्टीभित्रको छलफलमा सोही दिन शपथ लिने सहमति बनेको जनाइएको छ । यसपटक प्रतिनिधि सभामा रास्वपाले झण्डै दुईतिहाइ बहुमत (१८२ सिट) प्राप्त गरेकाले एकल सरकार गठन सहज देखिएको छ ।
मन्त्रिपरिषद्को आकार घटाउने विषय पनि रास्वपाको प्राथमिकतामा परेको छ । पार्टीले आफ्नो चुनावी वाचा अनुसार संघीय मन्त्रालयको संख्या १८ मा सीमित गर्ने योजना अघि सारेको छ । हाल संविधानले मन्त्रिपरिषद्को अधिकतम आकार २५ तोके पनि रास्वपाले सानो, प्रभावकारी र दक्ष मन्त्रिपरिषद् बनाउने लक्ष्य राखेको छ ।
मन्त्री चयनका लागि पार्टी नेतृत्वले सम्भावित उम्मेदवारहरूको सूची तयार पार्दै उनीहरूको पृष्ठभूमि, क्षमता र कार्यकुशलता मूल्यांकन गरिरहेको छ । स्रोतका अनुसार विषयविज्ञ, सेवा प्रवाहमा सक्षम र नेतृत्व क्षमता भएका व्यक्तिलाई प्राथमिकता दिने तयारी गरिएको छ ।
गृह मन्त्रालयका लागि उपसभापति डोलप्रसाद अर्याल (डिपी) र महामन्त्री सुनिल लम्सालको नाम चर्चामा रहेको छ । सभापति लामिछाने अर्याललाई गृहमन्त्री बनाउन चाहिरहेका छन् भने बालेन शाहको पक्षबाट लम्सालको नाम अघि सारिएको छ । यद्यपि यस विषयमा अन्तिम निर्णय भइसकेको छैन ।
अर्थ मन्त्रालयका लागि स्वर्णिम वाग्लेको नाम बलियो रूपमा अघि आएको छ भने सञ्चार मन्त्रालयमा प्रवक्ता मनिष झाको दाबी रहेको बताइएको छ । चितवन–३ बाट निर्वाचित सोबिता गौतमलाई कानुन मन्त्री बनाउने तयारी भइरहेको छ । शिशिर खनाललाई परराष्ट्र मन्त्रालयको जिम्मेवारी दिने चर्चा पनि चलेको छ ।
यसैबीच, सभामुख चयनबारे पनि पार्टीभित्र छलफल जारी छ । युवा अनुहारलाई प्राथमिकता दिने विषयमा सहमति खोजिँदैछ । इन्दिरा राना मगर र सोबिता गौतमको नाम सम्भावित उम्मेदवारका रूपमा चर्चामा छ ।
पार्टीका महामन्त्री कविन्द्र बुर्लाकोटीलाई मुख्य सचेतक र निशा डाँगीलाई सचेतक बनाउने विषयमा पनि आन्तरिक छलफल भइरहेको स्रोतले जनाएको छ ।
समग्रमा, रास्वपाले सानो, दक्ष र परिणाममुखी सरकार गठन गर्ने लक्ष्यसहित तीव्र गतिमा तयारी अघि बढाएको छ । मन्त्री चयनदेखि सरकार संरचना निर्माणसम्मका सबै प्रक्रिया अन्तिम चरणमा पुगेका छन् ।
