काठमाडौं । श्रम संस्कृति पार्टीका अध्यक्ष तथा नव निर्वाचित प्रतिनिधिसभा सदस्य हर्क साम्पाङले आफूहरू सरकारमा नजाने बताएका छन् ।
काठमाडौंमा पत्रकारसँग कुरा गर्दै उनले जनताले आफ्नो पार्टीलाई सरकारमा जाने म्यान्डेट नदिएको बताएका छन् । उनले आफू म्यान्डेट अनुसार आएको बताए ।
उनले भने, ‘जनताले हामीलाई प्रतिपक्षमा बसेर प्रश्न गर्ने म्यान्डेट दिएकोले म्यान्डेट अनुसार काम गर्नेछौँ ।’
सञ्चारकर्मीले देशका लागि राम्रो काम गर्न रास्वपाले सरकारमा बोलाए सहभागि हुने कि नहुने भनी राखेको जिज्ञासामा उनले सरकारमा सहभागी नहुने स्पष्ट पारे ।
उनले राम्रो काम गर्नेलाई श्रम संस्कृति पार्टीको सधैँ साथ र सहयोग हुने बताए । उनले भने ‘हामी राम्रो कामलाई साथ दिन्छौँ नराम्रो कामको सधैँ विरोध गर्छौँ ।’
उनले रास्वपाबाट बालेन नभई रवि लामिछाने प्रधानमन्त्री बन्नुपर्ने कुरा आज पनि दोहोर्याए ।
सञ्चारकर्मीले राखेको जिज्ञासामा उनले प्रतिपक्षले उठाएको प्रश्नको उत्तर दिन सक्ने मानिस मात्रै प्रधानमन्त्री हुनुपर्ने बताए ।
उनले भने ‘प्रतिपक्षीले सोधेको प्रश्नको उत्तर समय दिएर दिनुपर्छ ।’
उनले श्रम संस्कृति पार्टीलाई अहिले जनताले प्रश्न गर्ने ठाउँमा पुर्याएको बताए । उनले भने, ‘हामी प्रतिपक्षमा बसेर प्रश्न गर्छौँ । हामीले गरेको प्रश्नको उत्तर समय दिएर दिन सक्ने मान्छे प्रधानमन्त्री हुनपर्छ भनेको हो ।’
उनले चुनाव अगाडि आफू ‘प्रधानमन्त्री हुन्छु’ भनेका विषयमा पनि स्पष्ट पारे ।
उनले भने ‘केपी ओलीले पनि भनेको हो । गगन थापाले पनि भनेको हो । कुलमानजीले पनि भनेको हो । हर्क साम्पाङले पनि प्रधानमन्त्री बन्छु भनेर भनेको हो ।’
अहिले जनताको मत भन्दा हर्क साम्पाङको बोली ठुलो नभएको बताए । उनले भने, ‘जनताले प्रधानमन्त्री बनाउने मत दिएनन् । मेरो बोलीले प्रधानमन्त्री हुने कुरा भएन ।’
उनले लहर र लहडमा आफूहरूलाई जनताले मत नदिएको बताए । उनले भने, ‘हामीलाई किन प्रधानमन्त्री बनाउने मत आएन त्यो जनतालाई नै सोध्नुपर्छ ।’
उनले जनता भन्दा माथि आफू नरहेको प्रतिक्रिया दिए ।
