मुम्बई । बलिउड अभिनेत्री जरिन खानकी आमा परवीन खानको बुधबार बिहान निधन भएको छ। लामो समयदेखि विभिन्न स्वास्थ्य समस्यासँग जुधिरहेकी परवीनको निधन भएको जरिनको आधिकारिक टोलीले पुष्टि गरेको छ।
मुम्बईको अन्धेरी वेस्टस्थित वर्सोवा मुस्लिम कब्रिस्तानमा बिहान उनको अन्तिम संस्कार सम्पन्न गरिएको थियो। जरिनकी आमा विगत केही वर्षदेखि अस्वस्थ थिइन्। स्वास्थ्यमा गम्भीर समस्या देखिएपछि उनलाई पटक–पटक आपतकालीन कक्षमा भर्ना गरेर उपचार गरिँदै आएको थियो।
सन् २०२५ को अक्टोबरमा पनि उनलाई अस्पताल भर्ना गरिएको थियो, जतिबेला जरिनले सामाजिक सञ्जालमार्फत प्रशंसकहरूलाई प्रार्थना गरिदिन अपिल गरेकी थिइन्। आमाको हेरचाहकै लागि जरिनले केही समयअघि बलिउडबाट विश्राम समेत लिएकी थिइन्।
अभिनेत्री जरिनका लागि यो समय निकै पीडादायी बनेको छ। आमाको निधन हुनुभन्दा केही घण्टाअघि मात्रै उनले आफ्नो १५ वर्ष पुरानो घरपालुवा बिरालो ‘रेम्बो’ गुमाएकी थिइन्। सन् २०११ मा जन्मिएको उक्त बिरालोको अप्रिल ७ मा निधन भएको थियो।
जरिन आफ्नी आमासँग निकै नजिक थिइन्। उनले विगतका अन्तर्वार्ताहरूमा आफ्नी आमा निकै सरल स्वभावको भएको र उनलाई ग्ल्यामर दुनियाँको बारेमा खासै जानकारी नभए पनि साना–साना कुरामा खुसी हुने गरेको बताएकी थिइन्।
आमाको अनुहारमा मुस्कान देख्नु नै आफ्नो जीवनको ठूलो सफलता भएको बताउने जरिनका लागि यो अपूरणीय क्षति हो। उनको यस दुःखद घडीमा बलिउडकर्मी र प्रशंसकहरूले सामाजिक सञ्जालमार्फत श्रद्धाञ्जली व्यक्त गरिरहेका छन्।
