काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले सुकुम्बासीहरूको लगत सङ्कलन नेपाली सेनाले गरेको विषयमा प्रष्टीकरण दिएका छन् ।
बुधबार सिंहदरबारमा सञ्चारकर्मीसँग कुराकानी गर्दै उनले सेनाले गरेको कामका विषयमा प्रष्टीकरण दिएका हुन् । राज्यलाई सकारात्मक सोचका साथ गरिएको काम भएको हुनसक्ने उनले विश्वास लिएका छन् ।
‘आफ्ना बारेमा उठेका प्रश्नको सन्दर्भमा नेपाली सेनाले समय समयमा धारणा व्यक्त गर्दै आएको छ । मेरो अनुमानमा कहिले काहीँ राज्य संयन्त्रबाट सूचना प्राप्त गर्न सहज पनि हुनसक्छ । कतिपय संयन्त्रको आ–आफ्नै क्षमता छ । हुनसक्छ अझ बढी सक्रिय भएर लगत सङ्कलन गर्दा सरकारलाई सहज हुनसक्छ । त्यसकारण लगत सङ्कलन कुनै निर्माणका लागि पनि हुन सक्छ । राज्यलाई सघाउने हेतुले सकारात्मक सोचका साथ गरिएको भन्ने मलाई विश्वास छ’, रविले भने ।
