काठमाडौं। राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ मा ‘एनजी’ (नॉन-ग्रेडेड) प्राप्त गर्ने विद्यार्थीहरूका लागि आगामी असार १ गतेदेखि पूरक अर्थात् ग्रेड वृद्धि परीक्षा सञ्चालन गर्ने निर्णय गरेको छ।
यस वर्षको नियमित परीक्षामा सहभागी भएर कुनै पनि विषयमा न्यूनतम अंक ल्याउन नसकेका विद्यार्थीहरूको शैक्षिक सत्र खेर नजाओस् भन्ने उद्देश्यले बोर्डले परीक्षाको तालिका तय गरेको हो।
बोर्डले यसपटक विद्यार्थीको हितलाई ध्यानमा राख्दै परीक्षाको नीतिमा महत्त्वपूर्ण परिवर्तन समेत गरेको छ। विगतका वर्षहरूमा बढीमा दुई वटा विषयमा मात्र ग्रेड वृद्धि परीक्षा दिन पाउने व्यवस्था रहेकोमा यस वर्षदेखि भने नियमिततर्फका परीक्षार्थीले ‘एनजी’ आएका सबै विषयमा पूरक परीक्षा दिन पाउनेछन्।
बोर्डले अपनाएको यो लचिलो नीतिका कारण जतिसुकै विषयमा ग्रेड पुर्याउन नसकेका परीक्षार्थीहरूले पनि असार १ गतेदेखि सञ्चालन हुने परीक्षामा सामेल हुने अवसर पाउने भएका छन्।
यो व्यवस्थाले ठूलो संख्यामा विद्यार्थीहरूलाई पुनः परीक्षाको तयारी गर्न र माथिल्लो कक्षामा भर्ना हुन सहज हुने अपेक्षा गरिएको छ। बोर्डले परीक्षाको विस्तृत समय तालिका र केन्द्रहरूका बारेमा छिट्टै थप जानकारी सार्वजनिक गर्ने तयारी गरेको छ।
यसअघि नतिजामा देखिएको ‘एनजी’ का कारण चिन्तित बनेका विद्यार्थी र अभिभावकहरूका लागि बोर्डको यो निर्णयले ठूलो राहत प्रदान गरेको छ।
