काठमाडौँ । राष्ट्रिय स्वतन्त्र पार्टीका सांसद जगदीश खरेल ले प्रतिनिधिसभा बैठकमा दिएको अभिव्यक्तिपछि विपक्षी दलका सांसदहरू थप आक्रोशित भएका छन् ।
मंगलबार बसेको प्रतिनिधिसभा बैठकमा विपक्षी दलको विरोधका बीच पर्यटन विधेयकमाथि विचार गरियोस् भन्ने प्रस्तावमाथि छलफल भइरहेको थियो । सो क्रममा सांसद खरेलले विपक्षी सांसदहरूले सदनमा “तमाशा” देखाएको टिप्पणी गरेका थिए ।
उनले सरकारले अध्यादेश ल्याउनुको कारण अहिले सदनमा देखिएको घटनाक्रमले पुष्टि गरेको दाबी गर्दै संविधान जारी भएपछि बन्नुपर्ने ऐन तथा कानुनहरू संसदमा हुने अवरोध र विवादकै कारण बन्न नसकेको बताएका थिए । साथै, सदनबाट कानून निर्माण गर्ने प्रक्रियालाई कसैले रोक्न नसक्ने धारणा पनि उनले राखेका थिए ।
सांसद खरेलको अभिव्यक्तिपछि विपक्षी दलका सांसदहरूले विरोध जनाउँदै बैठकमा नाराबाजी गरेका थिए । त्यसपछि सभामुख डोल प्रसाद अर्याल ले छलफल बीचमै रोक्दै बैठक स्थगित गरेका हुन् ।
