एजेन्सी । अस्ट्रेलियाकी एक डिजाइनरले ट्याक्सिडर्मी (संरक्षित) मुसा प्रयोग गरेर तयार पारेको अनौठो अन्डरवेयर सार्वजनिक गरेपछि सामाजिक सञ्जालमा व्यापक चर्चा र विवाद सुरु भएको छ ।
‘र्याट ओडिटी गिजार्ड’ नामक ब्रान्डमार्फत तयार पारिएको उक्त अन्डरवेयरलाई ‘लिङ्जर्याट’ नाम दिइएको छ । डिजाइनरले इन्स्टाग्राममा यसको तस्बिर सार्वजनिक गरेपछि यो उत्पादन विश्वभर चर्चाको विषय बनेको हो ।
ब्रान्डले लामो समयदेखि संरक्षित मुसा प्रयोग गरेर विभिन्न कलात्मक सामग्री निर्माण गर्दै आएको बताइन्छ । तर यसपटक अन्डरवेयरमै प्रत्यक्ष रूपमा मुसा जडान गरिएको डिजाइन सार्वजनिक भएपछि मिश्रित प्रतिक्रिया देखिएको छ ।
केहीले यसलाई प्रयोगात्मक फेसन र कलात्मक अभिव्यक्तिको उदाहरणका रूपमा लिएका छन् भने धेरैले यसलाई अस्वाभाविक र अस्वीकार्य भन्दै आलोचना गरेका छन् ।
उक्त अन्डरवेयर दैनिक प्रयोगका लागि नभई कलात्मक सिर्जनाका रूपमा तयार गरिएको जनाइएको छ । यसको मूल्य करिब १९० अस्ट्रेलियाली डलर (झण्डै १३७ अमेरिकी डलर) राखिएको छ । कम्पनीले अन्तर्राष्ट्रिय ढुवानी सेवा समेत उपलब्ध गराएको जनाएको छ ।
विवाद र आलोचनाबीच पनि यो अनौठो डिजाइनले सामाजिक सञ्जालमा ठूलो ध्यान तानेको छ भने ब्रान्डलाई व्यापक प्रचारसमेत दिलाएको छ ।
