काठमाडौं । नेकपा एमालेका अध्यक्ष केपी शर्मा ओलीले एमालेलाई सरकारमा जान कसैले रोक्न नसक्ने दाबी गरेका छन् ।
सोमबार दैलेखको सदरमुकाममा आयोजित सार्वजनिक भेटघाट कार्यक्रममा बोल्दै अध्यक्ष ओलीले आगामी निर्वाचनमा एमाले एक्लैले बहुमत ल्याउने बताए । उनले एमालेलाई सरकारबाट हटाएर देशमा आतंक मच्चाइएको जिकीर गरे ।
एमाले जनताका लागि काम गर्ने पार्टी भएको र देश एमालेले मात्र विकास गर्न सक्ने उनको भनाइ थियो । उनले आगामी दिनमा विकासको लहर कसरी सिर्जना गर्ने भनेर अध्ययन र चिन्तन गर्न झुलाघाट–चिवाभञ्ज्याङ समृद्धिका लागि संकल्प यात्रा आयोजना गरेको बताए ।
अध्यक्ष ओलीले एमालेको ‘समृद्ध नेपाल सुखी नेपाली’ बनाउने अभियान सही छ भन्ने कुरा यात्राका क्रममा देखिएको नागरिकको सहभागिताले पुष्टि गरेको बताए ।
