काठमाडौं । नाइजेरियाको उत्तरी क्षेत्रमा अवस्थित कानो राज्यमा इस्लामिक प्रहरीले मंगलबार रमजानको समयमा खाना खाइरहेका ११ मुस्लिमलाई पक्राउ गरेको छ । कानोमा मुस्लिम बाहुल्य छन् र यहाँ इस्लामिक शरिया कानून लागू छ।
इस्लामिक पुलिस हिस्बाह भनेर चिनिन्छ। यो प्रहरीले रमजानको महिनामा खाना खाने ठाउँ र बजारमा अक्सर खोजी गरिरहन्छ।
पक्राउ पर्नेमा १ जना महिला र १० जना पुरुष रहेका छन् । जानीजानी फेरि रोजा नराख्ने गल्ती नगर्ने वाचा लिएर उनीहरुलाई रिहा गरिएको हो ।
हिस्बाहका प्रवक्ता लाभल फेगेले बीबीसीलाई भने, “हामीले मंगलबार ११ जनालाई समात्यौं, जसमध्ये एक महिला आफ्नै उत्पादनबाट बदाम बेच्दै थिइन् र केही मानिसहरूले हामीलाई यसबारे सचेत गराए ।”
“बाँकी १० जनालाई सहरको बजार क्षेत्र वरिपरि पक्राउ गरिएको थियो, जहाँ धेरै गतिविधि हुन्छ।”
उनले खोजी अभियान जारी रहने तर गैरमुस्लिमलाई यसबाट छुट दिइएको बताए ।
प्रवक्ताले भने, “हामी गैर-मुस्लिमहरूलाई पक्राउ गर्दैनौं किनभने तिनीहरूको यससँग कुनै सम्बन्ध छैन। यदि हामीले पत्ता लगायौं कि उनीहरूले मुस्लिमलाई बेच्ने मनसायले खाना तयार पारेका छन् भने उनीहरूलाई अपराधको लागि दोषी मानिन्छ।”
