काठमाडौँ । भारतको मुम्बई शहर अब अरबपतिहरू बस्ने शहरको हिसाबले विश्वको तेस्रो स्थानमा उक्लिएको छ ।अरबपतिको हिसाबले न्यूयोर्क पहिलो स्थानमा छ । यहाँ सबैभन्दा बढी ११९ अरबपतिहरू बस्छन् । त्यसपछि लन्डन आउँछ, जहाँ ९७ अर्बपति छन् । यो सूचीमा अब मुम्बई तेस्रो स्थानमा उक्लिएको छ ।
हुरुन ग्लोबल रिच लिष्ट २०२४ को रिपोर्टका अनुसार मुम्बईमा २६ नयाँ अरबपतिहरू थपिएसँगै अब ९२ अरबपति बस्ने गर्दछन् ।
मुम्बईले चीनको बेइजिङलाई उछिन्दै तेस्रो स्थानमा उक्लिएको हो । यस अघि १०९ अरबपति रहेको बेइजिङमा १८ अरबपति घटेर अहिले ९१ रहेको रिपोर्टमा उल्लेख छ ।
त्यस्तै चीनको शंघाईमा ८७, शेनजेनमा ८४, हङकङमा ६५, मस्कोमा ५९, भारतको नयाँ दिल्लीमा ५७ अरबपति रहेको रिपोर्टमा उल्लेख छ ।
ग्लोबल रिच लिस्टका अनुसार एलन मस्क अर्बपतिहरूको सूचीमा शीर्ष स्थानमा छन् भने जेफ बेजोस दोस्रो, बर्नार्ड आर्नल्ट तेस्रो, मार्क जुकर्बर्ग चौथो, लारी एलिसन पाँचौं, वारेन बफेट छैटौं, स्टेभेन बल्लमेर सातौँ, बिल गेट्स आठौँ, लारी पेज नवौं र मुकेश अम्बानी १०औ स्थानमा रहेका छन् । त्यसैगरी भारतका गौतम अडानी यस सूचीमा १५औं स्थानमा उक्लिएका छन् ।
