महानायक राजेश हमालले तीन सयभन्दा बढी चलचित्रमा काम गरिसकेका छन् । उमेरले ६० वर्ष पुग्न दुई महिना बाँकी छ । तर, फिट्नेसमा ध्यान दिएकै कारण उनी तीन बीस उमेरका देखिँदैनन् ।
राजेशका धेरै फ्यान देखिन्छन् । तर, कहिलेकाहीँ उनै फ्यानहरुका कारण अफ्ठ्यारोमा पर्ने गरेका छन् । नौ वर्ष अघिसम्म राजेशलाई उनैले सोध्थे– बिहे कहिले गर्ने ? २०७१ जेठमा धरानकी मधु भट्टराईसँग घरजम गरेपछि राजेश उक्त प्रश्नबाट मुक्त भए । त्यसपछि फ्यानहरुले सोध्न थाले ‘बच्चाको बाउ कहिले बन्ने ?’
बच्चा जन्माउने वा नजन्माउने वा कतिवटा जन्माउने भन्ने विषय राजेश दम्पतीको नीजि मामिला हो । सार्वजनिक जीवन बाँचिरहेका पात्र भएकाले फ्यानहरुले चासो राख्नु पनि अस्वाभाविक होइन ।
उनै राजेशले मधुसँगको एउटा रोमान्टिक तस्बिरहरु पछिल्लो समय सामाजिक सञ्जालमा सेयर गरेका छन् । तस्बिरमा राजेश कालो क्याप, कालो चस्मा र गाढा निलो स्यान्डोमा देखिएका छन् भने मधु रातो ड्रेसमा । तस्बिरले जोडी ‘रोमान्टिक फ्रेस–मूड’ मा रहेको भाव प्रकट गर्छ ।
ती तस्बिरलाई लिएर सामाजिक सञ्जाल प्रयोकर्ताहरुमध्ये केहीले राजेशको फिट्नेसको प्रशंसा गरेका छन् भने कतिपयले सुन्दर जोडीको विशेषण दिएका छन् । प्रतिक्रिया जनाएका अधिकांशले राजेशलाई बच्चाको बाउ कहिले हुने ? भनेर प्रश्न गरेका छन् । टंक कडायत लेख्छन्, ‘बच्चा खोई ?’
कुसाङ चेम्जोङ लिम्बुले ‘दोस्रो राजेश हमाल चाहीँ कहिले जन्माउने हो राजेश दाई ?’ भनेर लेखेका छन् । धु्रवराज जोशीको प्रतिक्रिया छ, ‘राजेश दाईले बुढेशकालसम्म पनि बडी राम्रो मेन्टेन गर्नु भएको छ । तर सानो राजेश हमालको बडी जन्माउने सुरसार किन नगरेको ?’
मेनुका शाह लेख्छिन्, ‘बल्ल बल्ल बिहे गर्नुभयो । सानो बाबु हेर्न पाइएला कि भनेको देख्न नपाई मरिएला जस्तो छ ।’ हिमाली थापाको सल्लाह छ, ‘ह्या दादा पनि । बडीसडीको चक्करमा नलागिस्यो न । भतिज र भतिजी कसरी बनाउने त्यतातिर सोचिस्यो । फाइदै फाइदा छ ।’
विजय राईले लेखेका छन्, ‘दाई जति बडि बनाएनी के काम, एउटा सानो बडिको चाँजोपाँचो नगरेसी ।’ करिब ५७ हजार फ्यानले लाइक गरेको उक्त तस्बिरमा हजारौंले राजेशलाई बच्चा जन्माउनेतर्फ अग्रसर नभएकोमा जिज्ञासा राखेका छन् ।
