काठमाडौँ । आज देखि लागु हुने गरि बाणिज्य बैंकहरूले ब्याजदर घटाएका छन् ।
असोज १ गतेदखि लागु हुने गरि हाल सञ्चालनमा रहेको २० बाणिज्य बैंकहरू मध्ये दुई बैंकले ब्याजदर बढाएको छ भने १० वटा बैंकले निक्षेपको ब्याजदर घटाएको छ । यस्तै, ८ बैंकले भने भदौँकै ब्याजदरलाई निरन्तरता दिने भएको छ ।
असोज महिनाका लागि औषतमा व्यक्तिगततर्फ मुद्दती निक्षेपमा ६.३८ प्रतिशत कायम गरिएको छ । यसअघि भदौ महिनाको औषत व्याजदर ६.५३ प्रतिशत थियो । भदौको भन्दा असोजमा ब्याजदर ०.१५ प्रतिशतले घटेको हो ।
असोज महिनाका लागि नेपाल बैंक र कृषि विकास बैंकले व्याजदर बढाएका छन् । नेपाल बैंक र कृषि विकास बैंकको व्याजदर क्रमशः ५.९५ र ६.०७ रहेको छ ।
ब्याजदर घटाउँदै राष्ट्रिय बाणिज्य बैंकले ६ , एभरेष्ट बैंकले ६ , सानिमा बैंकले ५.९, नेपाल एसबीआई बैंकले ६, सिटिजन्स बैंकले ६.१५, कुमारी बैंकले ६.०१, प्राइम कमर्सियल बैंकले ६.२५, नविल बैंकले ६.७५, एनएमबी बैंकले ६.५ र एनआईसी एसिया बैंकले ७.१८ प्रतिशत कायम गरेका छन् ।
त्यसैगरी, प्रभु बैंकले ६.१, ग्लोबल आईएमई बैंकले ६.२५, सिद्धार्थ, लक्ष्मी सनराइज र नेपाल इन्भेष्टमेन्ट मेघा बैंकले ६.५, हिमालयन, माछापुच्छ्रे, स्टान्डर्ड चार्टर्डले ७ प्रतिशत ब्याजदर कायम गरेका छन् । यी ८ वटा बैंकले भदौ महिनाकै ब्याजदरलाई निरन्तरता दिएका छन् ।
