सर्लाहीमा घाँस काट्न गएको बेला जंगली हात्तीको आक्रमणबाट एक किशोरको मृत्यु भएको छ । घटनामा अर्का एक जना गम्भीर घाइते भएका छन् ।
हरिपुर नगरपालिका– १ जानकीनगर जंगलमा मंगलबार दिउँसो हात्तीले आक्रमण गर्दा रामेछापको सैपु गाउँपालिका– २, लिखुतामाकोशी घर भई हाल सर्लाहीकै हरिवन नगरपालिका ७ बस्ने १४ वर्षीय शिव दाहालको मृत्यु भएको डिभिजन वन कार्यालय सर्लाहीले जनाएको छ ।
घटनामा सोही ठाउँका ५१ वर्षीय छविलाल काफ्ले गम्भीर घाइते भएका छन् । हात्तीको आक्रमणबाट घाइते काफ्लेको हरिवनस्थित नमूना अस्पतालमा उपचार भइरहेको छ ।
आक्रमणबाट किशोरको घटनास्थलमै मृत्यु भएको हो । काफ्लेले भने भागेर ज्यान जोगाएका छन् । दुई हात्तीले आक्रमण गर्न थालेपछि आफूले भागेर ज्यान जोगाएको काफ्लेले बताए ।
