वीरगञ्ज । प्रहरीले कुटेर आँखा फुटाइदिएको वीरगञ्ज महानगरपालिका–७ का वडाध्यक्ष हीराकाजी महर्जनले आरोप लगाएका छन् । वीरगञ्जमा बुधबार पत्रकार सम्मेलन गरी यस्तो आरोप लगाएका हुन् ।
गत आइतबार अष्टमीको राति वडा नम्बर ७ स्थित दुर्गा पूजाको अवसरमा आयोजित साँस्कृतिक जागरण कार्यक्रमका क्रममा आफूमाथि कुटपिट भएको वडाध्यक्ष महर्जनले बताए ।
राति साढे ११ बजे नवरात्रिको अवसरमा टोलमै साँस्कृतिक जागरण कार्यक्रमको लागि युवाहरुले आफूलाई बोलाएर प्रहरीसित कार्यक्रम गर्न दिन भनी छलफलका क्रममा प्रहरी चौकी नगवाका प्रहरी नायब निरीक्षक (सई) रबिन्द्र तुरहाले आँखामा हानेको वडाध्यक्ष महर्जनको आरोप छ ।
साथै उनले प्रहरीले आफूसहित पूजा समितिका अध्यक्षलाई पनि एक राति थुनामा राखेको बताए । कार्यपालिका सदस्य कन्हैया ठाकुरले जनप्रतिनिधिलाई कुटपिट गर्ने प्रहरीमाथि कारवाही हुनुपर्ने माग गरेका छन् ।
