काठमाडौं । वसन्त निरौला निर्देशित फिल्म ‘ज्वाइँ साब’को यतिबेला धमाधम सम्पादनको काम चलिरहेको छ । फिल्मको प्रदर्शन मिति चाँडै तय गर्ने तयारीमा निर्माता छन् ।
यसैबीच, फिल्मका लागि एक रोमान्टिक गीत रेकर्ड गरिएको छ । ‘कसम बत्तीको’ बोलको गीतमा गायक निशान भट्टराई र गायिका समीक्षा अधिकारीले स्वर भरेका छन् ।
यादव लम्सालको शब्द रहेको गीतमा अर्जुन पोखरेलको संगीत छ । गीतमा फिल्मका मुख्य दुई कलाकार जितु नेपाल र नीति शाहलाई फिचर गर्ने तयारी छ ।
यही एउटा गीतको छायांकन बाँकी राखेर अन्य छायांकन सकिएको निर्माताले जनाएका छन् । राजकुमार पण्डितको प्रस्तुतिमा तयार भएको फिल्ममा मीनादेवी खड्का, सौगात पण्डित र पदमलाल तामाङको लगानी छ ।
रेडआई फिल्म्सको प्रस्तुतिमा ओएसआर डिजिटल र मौसम फिल्म्सको सहकार्य निर्माण भएको फिल्ममा श्याम तामाङको छायांकन, अर्जुन पोखरेल र महेश ताम्राकारको संगीत छ । शंकर धितालको पटकथा तथा संवाद छ ।
