काठमाडौं । सर्वाधिक पाँच पटकको विश्वकप फूटबल विजेता ब्राजिल भेनेजुएलासँग बराबरीमा रोकिएको छ ।
विश्वकपको दक्षिण अमेरिकी छनोटअन्तर्गत शुक्रबार बिहान मोनागासमा भएको खेलमा ब्राजिल घरेलु टोली भेनेजुएलासँग १–१ गोलको बराबरीमा रोकिएको हो ।
ब्राजिलले खेलको ४३ औँ मिनेटमा राफिन्हाको गोलबाट अग्रता लिएको थियो । तर भेनेजुएला लगत्तै खेलमा फर्कियो । टेलास्को सेगोभियाले पहिलो हाफको अन्त्यमा नै बराबरी गोल फर्काए ।
भेनेजुएला खेलको अन्त्यतिर १० खेलाडीमा सीमित भएको थियो । अलेक्जेन्डर गोन्जालेजले ८९ औँ मिनेटमा कातो कार्ड खाएका थिए । तर यसको फाइला ब्राजिलले उठाउन सकेन ।
यो नतिजापछि ब्राजिल १७ अंकमा तेस्रो स्थानमा उक्लिएको छ । बराबरी नतिजाका बाबजुद उसको विश्वकप छनोट यात्रा लयमा फर्काएको मान्न सकिन्छ । यसअघि लगातार खराब प्रदर्शनका कारण ब्राजिलको विश्वकप छनोट सम्भावना कमजोर बनेको थियो ।
भेजेजुएला १२ अंकका साथ तालिकाको सातौँ स्थानमा छ । दक्षिण अमेरिकाबाट ६ टोली सिधैँ विश्वकपमा छनोट हुनेछन् ।
