गाजा । गाजाको खान युनिसस्थित नासेर अस्पतालले इजरायली हवाई आक्रमणमा आफ्ना एक डाक्टरका १० मध्ये नौ सन्तानको मृत्यु भएको बताएको छ।
अस्पतालका अनुसार डा. अल्ला अल-नज्जरको घरमा इजरायली हवाई आक्रमणमा उनका एक छोरा र श्रीमान घाइते भएका छन्।
हमासद्वारा सञ्चालित स्वास्थ्य मन्त्रालयका निर्देशकले साझा गरेको र बीबीसीले प्रमाणित गरेको भिडियोमा शुक्रबार खान युनिसमा भएको आक्रमणपछि भग्नावशेषबाट शवहरू निकालिएको देखिन्छ।
शनिबार एक विज्ञप्तिमा, इजरायली रक्षा बल (आईडीएफ) ले विगत २४ घण्टामा गाजामा १०० भन्दा बढी लक्ष्यहरूमा आक्रमण गरेको बताएको छ। स्वास्थ्य मन्त्रालयले शनिबार मध्यान्हसम्मको २४ घण्टाको अवधिमा इजरायली सेनाले कम्तीमा ७४ जनाको हत्या गरेको दाबी गरेको छ।
स्वास्थ्य मन्त्रालयका निर्देशक डा. मुनीर अल्बोर्शले एक्समा दिएको जानकारी अनुसार डा. अल-नज्जरका श्रीमान् हम्दीले आफ्नी श्रीमतीलाई काममा लगेर घर फर्केको केही मिनेटपछि घरमा आक्रमण भएको थियो। डा. अल्बोर्शले डा. अल-नज्जरका जेठा छोरा १२ वर्षको रहेको जानकारी दिएका छन्।
