क्यानबेरा । भर्जिन अस्ट्रेलियाले आफ्ना यात्रीसँग माफी मागेको छ । यात्राको क्रममा एउटा फ्लाइटमा यात्रुहरूले लाजमर्दो अवस्थाको सामना गर्नुपरेपछि कम्पनीले माफी मागेको हो ।
विमानको शौचालय काम नगरेपछि यात्रीहरूले बोतलमा पिसाब गर्न बाध्य भएका थिए । यो घटना गत हप्ता इन्डोनेसियाको बालीबाट अस्ट्रेलियाको ब्रिस्बेन आउँदै गरेको उडानमा भएको थियो । समस्या भोगेको उडान बोइङ ७३७ म्याक्स ८ विमान भएको बताइएको छ ।
विमान बिहीबार दिउँसो डेनपासरबाट प्रस्थान गरेको थियो । उडानको समयमा मर्मतका कारण पछाडिको शौचालय पहिले नै बन्द गरिएको थियो । तर यात्राको क्रममा, बाँकी शौचालयहरू पनि बिग्रिए, जसका कारण यात्रुहरूले ६ घण्टाको उडानमा शौचालयको सुविधा पाएनन् ।
विमानमा देखिएको यो समस्याबारे यात्रीहरूले सामाजिक सञ्जालमा आफ्नो असन्तुष्टि व्यक्त गरेका छन् । अन्तिम तीन घण्टा धेरै गाह्रो भएको अनि केही मानिसहरूले बोतलमा पिसाब गर्नुपरेको अर्का यात्रीले बताए । यात्रुहरू दुर्गन्ध र असुविधाबाट दिक्क बनेको अर्का एक यात्रुले भनेका थिए ।
अवस्था निकै बिग्रिएकोले एक जना वृद्ध महिलाले आफूलाई नियन्त्रण गर्न नसकेर सार्वजनिक रूपमा पिसाब फेर्न बाध्य भएको बताइएको छ । उडानको बीचमा सबै शौचालयहरूले काम गर्न छोडेपछि बाँकी समय आफूहरूलाई बोतलमा वा पहिले नै फोहोर भइसकेको शौचालयमा पिसाब फेर्न भनिएको अर्का एक यात्रीले भने । यो अपमानजनक र तनावपूर्ण भएको उनको भनाइ थियो ।
यस घटनाप्रति भर्जिन अस्ट्रेलियाले माफी मागेको छ । यात्रुहरूलाई पर्न गएको असुविधाको लागि कम्पनीलाई पछुतो भएको र प्रभावित व्यक्तिहरूलाई फ्लाइट क्रेडिट दिइने बताइएको छ ।
यो कठिन परिस्थितिलाई सम्हाल्न प्रयास गर्ने आफ्ना कर्मचारीहरूको एयरलाइनले प्रशंसा गरेको छ । अस्ट्रेलियाली यातायात मजदुर सङ्घले घटनाको आलोचना गरेको छ । यसलाई सङ्घले यात्रु र चालक दलका लागि गम्भीर स्वास्थ्य खतरा बताएको छ ।
