बेइजिङ। हड्डी भाँचिँदा हुने असह्य पीडालाई कम गर्न तथा उपचार प्रक्रियालाई छिटो र सरल बनाउन चिनियाँ वैज्ञानिकहरूले एक क्रान्तिकारी खोज गरेका छन्। उनीहरूले ‘बोन–०२’ नामको एक जैविक ग्लु विकास गरेका छन्, जसमा फुटेको वा भाँचिएको हड्डीलाई केही मिनेटमै जोड्न सक्ने अद्भुत क्षमता रहेको दाबी गरिएको छ।
हाङ्जाउका अनुसन्धानकर्ताहरूले यो ग्लु बनाउन समुद्री ओइस्टर (एक प्रकारको समुद्री जीव) बाट प्रेरणा लिएका हुन्। ओइस्टरहरूले नुनिलो पानीको सतहमा पनि आफूलाई बलियोसँग टाँसेर राख्न सक्ने प्राकृतिक मेकानिजमलाई नक्कल गर्दै उनीहरूले ‘बोन–०२’ को निर्माण गरेका हुन्।
परम्परागत शल्यक्रियाको विकल्प
एक परीक्षणका क्रममा, हात भाँचिएका एक बिरामीमा भाँचिएको ठाउँमा ३ सेन्टिमिटरको सानो चिरा बनाएर बोन–०२ इन्जेक्ट गरिएको थियो। यो उपचार गरेको तीन मिनेटमै हड्डी स्थिर भएर सफलतापूर्वक जोडिएको थियो।
सामान्य अवस्थामा यस्तो फ्र्याक्चर जोड्न धातुको प्लेट र स्क्रू प्रयोग गरी शल्यक्रिया गर्नुपर्ने र पछि ती धातुहरू निकाल्न पुनः अर्को शल्यक्रिया गर्नुपर्ने झन्झट रहन्थ्यो। बोन–०२ प्रयोग गर्दा यो सबै झन्झट हटेको छ। परीक्षण गरिएका बिरामीहरू तीन महिनापछि पूर्ण रूपमा निको भएको पुष्टि भएको छ। अहिलेसम्म १५० भन्दा बढी बिरामीमा यो ग्लु सफलतापूर्वक प्रयोग भइसकेको र उनीहरूमा कुनै गम्भीर जटिलता नदेखिएको वैज्ञानिकहरूले बताएका छन्।
दोस्रो शल्यक्रियाको आवश्यकता समाप्त
‘बोन–०२’ को सबैभन्दा महत्त्वपूर्ण विशेषता भनेको शरीरले यसलाई प्राकृतिक रूपमा सोस्छ । यसले गर्दा हड्डी जोड्नका लागि धातुको प्रयोग वा धातु निकाल्नका लागि दोस्रो शल्यक्रियाको आवश्यकता पर्दैन। साथै, यसले सङ्क्रमणको जोखिम पनि न्यून गर्दछ।
यद्यपि, यो प्रविधि चीनभित्र र बाहिर दुवै ठाउँमा पेटेन्ट गरिएको भए पनि यसको पूर्ण सुरक्षा र प्रभावकारिता प्रमाणित गर्नका लागि थप क्लिनिकल परीक्षणहरू आवश्यक रहेको अनुसन्धानकर्ताहरूको भनाइ छ।
