जापानमा आइतबार साँझ ६.७ म्याग्निच्युडको भूकम्प गएपछि इवाते प्रिफेक्चरमा सुनामीको चेतावनी जारी गरिएको छ। जापानको मौसम विभागका अनुसार, भूकम्पपछि करिब एक मिटर उचाइका सुनामीका छालहरू इवातेको तटीय क्षेत्रहरूमा पुग्ने सम्भावना रहेको छ।
भूकम्प स्थानीय समय अनुसार साँझ ५:०३ बजे गएको थियो। जापानी भूकम्प मापन स्केल (शिन्दो) अनुसार मोरिओका सहर र याहाबा गाउँमा “शिन्दो ४” स्तरको कम्पन महसुस गरिएको द जापान टाइम्सले जनाएको छ।
रॉयटर्सका अनुसार, जापानको सार्वजनिक प्रसारक एनएचकेले तटीय क्षेत्रका बासिन्दालाई तत्काल समुद्र किनाराबाट टाढा रहन आग्रह गरेको छ। एनएचकेले दिएको जानकारीअनुसार, इवाते प्रिफेक्चरको तटबाट करिब ७० किलोमिटर (४५ माइल) टाढा समुद्रमा साँझ ५:१२ बजे सुनामी देखा परेको थियो, जुन केही समयमै प्रशान्त तटीय क्षेत्रमा पुग्ने अपेक्षा गरिएको छ।
अहिलेसम्म मानवीय क्षति वा भौतिक नोक्सानीबारे विवरण प्राप्त भएको छैन। जापानी अधिकारीहरूले सम्भावित परकम्प र थप छालका लागि उच्च सतर्कता अपनाउन जनतालाई अनुरोध गरेका छन्।
जापान विश्वका सबैभन्दा भूकम्पप्रवण मुलुकमध्ये एक हो, र त्यहाँ सानो मापनका भूकम्पहरू पनि नियमित रूपमा महसुस हुने गर्छन्। तर समुद्री क्षेत्र नजिकैको ६.७ म्याग्निच्युडको भूकम्पपछि सुनामी चेतावनी जारी हुनुले स्थानीय प्रशासन सतर्क अवस्थामा पुगेको जनाइएको छ।
