कोलम्बो । श्रीलङ्काका प्रमुख अलराउन्डर वानिन्दु हसरङ्गा चोटका कारण सन् २०२६ को टी-२० विश्वकपबाट बाहिरिएका छन्। कोलम्बोमा आइतबार आयरल्याण्डविरुद्ध भएको पहिलो खेलका क्रममा उनलाई ह्यामस्ट्रिङमा गम्भीर चोट लागेको थियो।
हसरङ्गाले उक्त खेलमा उत्कृष्ट बलिङ गर्दै चार ओभरमा २५ रन खर्चेर तीन विकेट लिएका थिए, जसले आयरल्याण्डको १६४ रनको लक्ष्य पछ्याउने योजनालाई पूर्ण रूपमा बिगारिदिएको थियो।
सोमबार गरिएको एमआरआई स्क्यानले उनको बायाँ ह्यामस्ट्रिङमा गम्भीर चोट देखाएको हो। बेलायतका विशेषज्ञ चिकित्सकले रिपोर्टको अध्ययन गरेपछि मंगलबार उनलाई प्रतियोगिताका लागि अयोग्य घोषित गरिएको थियो।
हसरङ्गा लामो समयदेखि चोटसँग संघर्ष गर्दै आएका छन् र यो पछिल्लो चोट उनको पुरानै समस्यासँग सम्बन्धित रहेको बुझिएको छ। विश्वकपको मुखमा आफ्नो मुख्य हतियार गुमाउनु श्रीलङ्काका लागि ठूलो धक्का सावित भएको छ। हसरङ्गाले टी-२० विश्वकपका २० इनिङ्समा ६.०१ को इकोनोमी रेटमा ४० विकेट लिँदै आफूलाई यस फर्म्याटको उत्कृष्ट बलरका रूपमा प्रमाणित गरिसकेका छन्।
अन्तर्राष्ट्रिय क्रिकेट परिषद् (आईसीसी) ले हसरङ्गाको स्थानमा लेग स्पिनिङ अलराउन्डर दुशान हेमन्तलाई टोलीमा समावेश गर्न अनुमति दिएको छ। ३१ वर्षीय हेमन्तसँग अन्तर्राष्ट्रिय खेलको अनुभव कम भए पनि उनीसँग हसरङ्गाकै जस्तो सीप रहेको मानिन्छ।
उनले हालसम्म केवल तीनवटा टी-२० अन्तर्राष्ट्रिय खेल खेलेका छन्। टोलीमा अन्य विशेषज्ञ स्पिनर नभएका कारण उनलाई बिहीबार ओमानविरुद्ध हुने खेलमा सीधै अन्तिम ११ मा समावेश गर्ने सम्भावना उच्च छ।
श्रीलङ्काले अब समूह चरणका बाँकी खेलहरूमा हसरङ्गा बिना नै प्रतिस्पर्धा गर्नुपर्नेछ। श्रीलङ्काको दोस्रो खेल फेब्रुअरी १२ मा पालेकेलेमा ओमानसँग हुनेछ। त्यसपछि फेब्रुअरी १६ मा अस्ट्रेलियासँग र फेब्रुअरी १९ मा जिम्बाब्वेसँग कोलम्बोमा प्रतिस्पर्धा गर्ने तालिका छ।
