एजेन्सी । भारतको बेंगलुरुमा एक प्रसिद्ध कन्नड टेलिभिजन अभिनेत्रीको गोप्य रूपमा आपत्तिजनक भिडियो खिचेर पैसा मागिएको घटना सार्वजनिक भएको छ।
गत फेब्रुअरी ७ मा कोरमंगला इन्डोर स्टेडियममा आयोजित सेलिब्रिटी महिला क्रिकेट प्रतियोगिताका दौरान ट्वाइलेटमा अभिनेत्रीको भिडियो खिचिएको हो।
रियालिटी शोको पूर्व प्रतिस्पर्धी समेत रहेकी ती अभिनेत्रीले अज्ञात व्यक्तिले आफ्नो जानकारी बिना भिडियो रेकर्ड गरेको र पछि इन्स्टाग्राममार्फत पठाएर ब्ल्याकमेल गरेको आरोप लगाएकी छिन्।
आरोपितले अभिनेत्रीको साथीको इन्स्टाग्राम अकाउन्टमा उक्त अश्लील भिडियो पठाउँदै थप भिडियो कल गर्न र पैसा तिर्न दबाब दिएको उजुरीमा उल्लेख छ। पैसा नदिएमा भिडियोलाई अन्य सामाजिक सञ्जालमा सार्वजनिक गरिदिने धम्की समेत दिइएको छ।
