काठमाडौं । टेलिभिजन रियालिटी शो ‘कमेडी नाइट विथ च्याम्पियन्स’ मा नेकपा एमालेका सचिव महेश बस्नेत अतिथिको रूपमा देखिएपछि कार्यक्रमलाई लिएर सामाजिक सञ्जालमा विवाद चर्किएको छ ।
कार्यक्रमका निर्देशक तथा प्रस्तोता विशाल भण्डारीले मंगलबार फेसबुकमार्फत प्रतिक्रिया दिँदै अतिथिलाई लिएर गालीगलौज गर्नेहरुविरुद्ध कानुनी उपचार खोज्ने चेतावनी दिएका छन् । उनले कार्यक्रम सधैँ निष्पक्ष रूपमा सञ्चालन हुँदै आएको दाबी पनि गरेका छन् ।
नयाँ एपिसोडको ट्रेलर सार्वजनिक भएपछि सामाजिक सञ्जालमा कार्यक्रम र भण्डारीको आलोचना सुरु भएको हो । केही प्रयोगकर्ताले कार्यक्रम बहिष्कार गर्नेसम्मको चेतावनी दिएका छन् ।
भण्डारीले भने यसअघि पनि विभिन्न दलका नेताहरू कार्यक्रममा सहभागी भइसकेको स्मरण गराएका छन् । उनका अनुसार राष्ट्रिय स्वतन्त्र पार्टीका नेता तीन पटक, राप्रपाका एक पटक, नेपाली कांग्रेसका एक पटक र तत्कालीन नेकपा (एकीकृत समाजवादी) का नेता एक पटक अतिथिका रूपमा आएका छन् ।
उनले सामाजिक सञ्जालमा आएको अपमानजनक टिप्पणी र धम्कीप्रति संकेत गर्दै कार्यक्रमलाई प्रजातान्त्रिक र निष्पक्ष रूपमा सञ्चालन गर्न अवरोध भए कानुनी बाटो रोज्ने बताए । साथै सबै दलका नेता तथा कार्यकर्तालाई कार्यक्रम सञ्चालनमा अवरोध नगर्न आग्रह गरेका छन् ।
ट्रेलर सार्वजनिक भएपछि फेसबुक र युट्युबमा दर्शक प्रतिक्रिया विभाजित देखिएका छन् । केहीले कार्यक्रमले विवादास्पद व्यक्तिलाई स्थान दिएको आरोप लगाएका छन् भने केहीले कलाकारले सबैको व्यंग्य र नक्कल गर्न पाउनुपर्ने भन्दै कार्यक्रमको बचाउ गरेका छन् ।
यसैबीच, बस्नेत अतिथि बनेर पुगेको कार्यक्रममा रास्वपा उम्मेदवार सुधन गुरुङको क्यारिकेचर कलाकार प्रभात लामाले गरेका थिए । लामाको प्रस्तुतिलाई लिएर समेत धम्की आएको निर्देशक भण्डारीले बताएका छन् ।
भण्डारी लेख्छन् :
हाम्रो विचार र समर्थनलाइ साइडमा राखेर निश्पक्ष रुपमा ‘कमेडी नाइट विथ च्याम्पियन्स’ कार्यक्रम चलाउने क्रममा रास्वपाका नेता ३ पटक, राप्रपाका १ पटक, कांग्रेसको १ पटक, तत्काल्न कलमका १ पटक र एमालेको १ पटक बोलाएका थियौं । हामीलाइ हरेक पटक एउटा दलको बोलाउँदा अर्को पक्षबाट सामाजिक संजालमा आक्रमण हुदै नै आइरहेको हो । यो कुनै नौलो कुरा हैन । तर भ्रष्टाचार नातावाद व्यक्तिवाद र दलको सिण्डिकेटको विरोध गर्दै सडक आन्दोलन गरेका न्भ्ल्श् समुहका भाइ बैनिले महेस बस्नेत बोलाएको आज आउदै गरेको एपिसोडको ट्रेलर हेरेकै भरमा जुन सत्तो सराप गरिरहेका छन् । के हामीले यस्तै समाज र सत्ता बनाउन खोजेको हो ? जहाँ कुनै दल विशेषको व्यक्ति मात्र कार्यक्रमले गेष्ट बोलाउनु पर्ने ? पुराना लाई मात्र उडाउनु पर्ने र नया लाइ देवत्वकरणनै गरिदिनु पर्ने ? पुरानाको मात्र मिमिक्री गर्नु पर्ने नयाको गर्नै नहुने ? सायद हैन ! हामीले प्रश्न गर्न बोल्न र हाँसिमजाक गर्न पाउने समाजको परिकल्पना गर्दै परिवर्तन खोजेको हो । म फेरिपनि भन्छु हामी परिवर्तनकै पक्षधर हौ । तर विचारलाइ साइडमा राखेर कार्यक्रमलाइ प्रजातान्त्रिक स्वरुपमा उभाएर निश्पक्ष रुपमा संचालन गर्न रोक्ने छेक्ने र धम्काउने क्रियाकलाप नगर्न सबै दलका नेता कार्यकर्ता लाई अनुरोध गर्न चाहन्छौ । तर यो धाक धम्कीको क्रम नरोकिए कानुनी उपचार खोज्न हामी बाध्य हुने चेतावनी पनि दिन चाहन्छौ । धन्यवाद ।’
