कुवेत सिटी । मध्यपूर्वमा जारी इरान, इजरायल र अमेरिकाबिचको तनावका बिच आइतबार बिहान पर्सियन खाडीका विभिन्न देशहरूमा ड्रोन र क्षेप्यास्त्र आक्रमणको नयाँ लहर देखिएको छ । कुवेतको सेनाले आइतबार बिहान शत्रुतापूर्ण ड्रोनको लहरले कुवेत अन्तर्राष्ट्रिय विमानस्थलनजिकको इन्धन भण्डारण क्षेत्रमा निशाना बनाएको जनाएको छ । सेनाका अनुसार वायु प्रतिरक्षा प्रणालीले केही ब्यालिस्टिक क्षेप्यास्त्र र ड्रोनलाई आकाशमै खसालेको थियो, तर अवशेष र छर्राले केही नागरिक संरचनामा क्षति पुगेको बताइएको छ ।
सरकारी सञ्चारमाध्यमका अनुसार ड्रोन आक्रमणमा कुवेतको सार्वजनिक सामाजिक सुरक्षा संस्थाको मुख्य भवनमा पनि आगलागी भएको थियो । करिब २२ तले उक्त भवनमा बिहान सबेरै आगो लागेको दृश्य सार्वजनिक भएको भए पनि मानवीय क्षति भने नभएको जनाइएको छ । यसैबिच कुवेती सञ्चारमाध्यमले आइतबार बिहान सीमा सुरक्षा ड्युटीमा रहेका दुई जना सुरक्षाकर्मीको मृत्यु भएको जनाएको छ । उनीहरूको मृत्यु आक्रमणसँग सम्बन्धित हो वा होइन भन्ने स्पष्ट भइसकेको छैन ।
यता साउदी अरबको रक्षा मन्त्रालयले पनि आइतबार बिहानै ड्रोन आक्रमणको सामना गर्नुपरेको जनाएको छ । मन्त्रालयका अनुसार वायु प्रतिरक्षा प्रणालीले कम्तीमा २१ वटा ड्रोनलाई नष्ट गरेको थियो । यसअघि साउदी अराम्कोको रास तानुरा तेल प्रशोधन केन्द्रमामा पनि ड्रोन आक्रमण भएको खबर सार्वजनिक भएको थियो ।
त्यस्तै बहराइनको मिना सलमान बन्दरगाहको एक संरचनामा आगलागी भएको छ । बहराइनको गृह मन्त्रालयले यसलाई इरानी आक्रमणको परिणाम भएको दाबी गरेको छ र आगो नियन्त्रणका लागि आपत्कालीन सेवाहरू परिचालन गरिएको जनाएको छ । उता संयुक्त अरब इमिरेट्समा पनि सम्भावित क्षेप्यास्त्र आक्रमणको खतरा देखिएपछि वायु प्रतिरक्षा प्रणाली सक्रिय पारिएको छ । राष्ट्रिय आपत्कालीन संकट तथा विपद् व्यवस्थापन प्राधिकरणले सामाजिक सञ्जालमार्फत मिसाइल खतराको जवाफ दिइरहेको जनाएको छ ।
यी आक्रमणहरू इरानी राष्ट्रपति मसुव पेजेश्कियानले शनिबार खाडीका देशहरूलाई सम्बोधन गर्दै पछिल्लो एक हप्तामा अमेरिकी सैन्य अड्डाहरू लक्षित गरेर गरिएको ड्रोन तथा मिसाइल आक्रमणका कारण उत्पन्न तनावप्रति दुःख व्यक्त गरेको समयमा भएका हुन् । छिमेकी देशहरूले इरानमाथि अमेरिकी आक्रमणमा सहयोग गरेनन् भने भने आफूले पनि आक्रमण नगर्ने पेजेश्कियानको कार्यालयले भनेको थियो ।
