काठमाडौ । ललितपुर महानगरपालिका–१२ स्थित कृष्ण मन्दिर परिसरमा छुरा प्रहारबाट दुई जनाको हत्या भएको छ। मृतक दाजुभाइ ३३ वर्षीय सुमित नेम्बाङ र २५ वर्षीय सृजन नेम्बाङ हुन्। उनीहरू झापाको कमल गाउँपालिका–६ घर भएकाले इमाडोलमा बस्दै आएका थिए।
प्रहरीका अनुसार घटनाको मुख्य कारण गलत नम्बरमा फोन गएको विवाद हो। सुमितले फोन गर्दा नम्बर नचिनिएका सञ्जीव नेपाली ‘सञ्जु’ मा पुग्छ। फोनमा भएको कुरा पछि उनीहरूबीच विवाद बढ्छ र साँझ ७ बजे मङ्गलबजारतर्फ सञ्जीव स्कुटरमा गगन सुनारसहित पुग्छन्।
कृष्ण मन्दिर परिसरमा झगडा बढ्दा सञ्जीवले मासु काट्ने छुरा निकाल्छन्। सुमितले उनको हात समातेर पन्च हान्छन्। त्यसपछि सञ्जीवले सुमितको पेटमा, र सृजनको घाँटी र पेटमा छुरा प्रहार गर्छन्। दाजुभाइ घाइते भएर मन्दिर परिसरमा ढल्छन्।
घटनास्थलमा तीन मिनेटभित्र प्रहरी पुगेको थियो। सञ्जीव भाग्ने क्रममा पक्राउ परे। मृतक दाजुभाइलाई उपचारका लागि बी एन्ड बी अस्पताल लगिएको थियो, तर अस्पतालले उनीहरूलाई मृत घोषणा गर्यो।
एसएसपी होविन्द्र बोगटीले घटनामा आवेश र उत्तेजना मुख्य कारण रहेको बताए। सुमित लन्डन जाने तयारीमा थिए, तर गलत नम्बरले उनीहरूको जीवन समाप्त गर्यो।
