बुटवल । पाल्पाको नुवाकोटबाट बुटवलतर्फ आउँदै गरेको स्कुटर दुर्घटना हुँदा मंगलबार साँझ दुई युवतीको मृत्यु भएको छ ।
प्रहरीका अनुसार लु ३४ प ५७६६ नम्बरको स्कुटर ओरालो सडकमा अनियन्त्रित भई दुर्घटना भएको हो । दुर्घटनामा परी कपिलवस्तु बाणगंगा नगरपालिका–७ की १९ वर्षीया निशा कुँवर र बुटवल उपमहानगरपालिका–११, कालिकानगर रामपथकी १८ वर्षीया पूर्णिमा मगरको ज्यान गएको छ ।
स्कुटर चालक कपिलवस्तु बाणगंगा–७, बनगाईका सोमन श्रेष्ठ गम्भीर घाइते भएका छन् । एउटै स्कुटरमा तीन जना सवार रहेको र साँझ करिब ८ बजेतिर दुर्घटना भएको इलाका प्रहरी कार्यालय बुटवलले जनाएको छ ।
दुर्घटना लगत्तै घाइतेहरूलाई उपचारका लागि लुम्बिनी प्रादेशिक अस्पताल लगिएको थियो । अस्पताल पुर्याए लगत्तै उपचारका क्रममा चिकित्सकले दुई जनालाई मृत घोषणा गरेका थिए । घाइते चालकको उपचार भइरहेको छ ।
घटनाका सम्बन्धमा थप अनुसन्धान भइरहेको प्रहरीले जनाएको छ ।
