काठमाडौँ । फिफा विश्वकप २०२६ अन्तर्गत अन्तिम ३२ को अन्तिम खेलमा कोलम्बियाले घानालाई १–० ले पराजित गर्दै अन्तिम १६ मा स्थान सुरक्षित गरेको छ।
क्यान्सस सिटी स्टेडियममा भएको खेलमा कोलम्बियाको जितमा १४औँ मिनेटमा जोन आरियासले गरेको एकमात्र गोल नै निर्णायक बन्यो। लुइस सुवारेजको उत्कृष्ट पासमा आरियासले गोल गर्दै टोलीलाई सुरुआती अग्रता दिलाएका थिए।
गोलपछि घानाले दोस्रो हाफमा बराबरीका लागि दबाब बढाए पनि कोलम्बियाको सुदृढ रक्षापङ्क्ति र गोलरक्षक क्यामिलो भार्गासलाई भेद्न सकेन। घानाले खेलभर गोलपोस्टको दिशामा प्रभावकारी प्रहार गर्न संघर्ष गर्नुपर्यो।
यता कोलम्बियाले अग्रता दोब्बर बनाउने अवसर पनि पाएको थियो। ५६औँ मिनेटमा लुइस डियाजले गरेको गोल अफसाइडका कारण रद्द भएको थियो भने त्यसको केहीबेरपछि उनको अर्को प्रहार घानाका गोलरक्षक लरेन्स अटी जिगीले उत्कृष्ट बचाउ गरेका थिए।
अन्तिम समयसम्म घानाले बराबरी गोलका लागि निरन्तर प्रयास गरे पनि कोलम्बियाले आफ्नो एक गोलको अग्रता सुरक्षित राख्दै विजयी यात्रा तय गर्यो।
यस जितसँगै कोलम्बियाले अन्तिम १६ मा स्थान बनाएको छ, जहाँ उसले स्विट्जरल्यान्डसँग प्रतिस्पर्धा गर्नेछ।
