न्युयोर्क । फ्रान्सका फरवार्ड किलियन एम्बाप्पेले आफ्नो उत्पत्ति र शिक्षालाई लिएर रङ्गभेदी टिप्पणी गर्ने पाराग्वेकी एक महिला सांसदको कडा शब्दमा निन्दा गरेका छन्। उनले ती सांसदलाई नीच र आफ्नो पदका लागि अयोग्य भएको बताएका हुन्।
पाराग्वेको लिबरल र्याडिकल पार्टीकी सांसद सेलेस्ते आमारियाले विश्वकपको अन्तिम १६ मा फ्रान्ससँग पाराग्वे पराजित भएपछि सामाजिक सञ्जाल एक्समा रङ्गभेदी टिप्पणी पोस्ट गरेकी थिइन्। एम्बाप्पेले त्यसको जवाफ दिँदै भनेका छन्, ‘सेलेस्ते आमारिया, तपाईं एक नीच महिला हुनुहुन्छ र आफ्नो पदका लागि अयोग्य हुनुहुन्छ।’
ती सांसदले प्रतियोगिताभर पसिना, जोस र सम्मानका साथ खेलेको पाराग्वेको प्रतिनिधित्व नगर्ने एम्बाप्पेले स्पष्ट पारेका छन्। उनको लापरबाही र निर्लज्ज रङ्गभेदका कारण यस विश्वकपमा पाराग्वेका खेलाडीले गरेको ऐतिहासिक प्रयास र यात्रालाई पुरै विश्वले बिर्सिसकेको भन्दै एम्बाप्पेले आफ्नो देशको सबैभन्दा खराब छवि देखाउने एक अक्षम महिलाका लागि ठाउँ बनेको उल्लेख गरेका छन्। आफूले उनी जस्ता मानिसहरूलाई विश्वभर घृणा र रङ्गभेद फैलाउने स्वतन्त्रता कहिल्यै नदिने एम्बाप्पेले बताएका छन्।
फ्रेन्च फुटबल महासङ्घ (एफएफएफ) ले आमारियाको भनाइलाई पूर्ण रूपमा घृणाजनक र अक्षम्य भन्दै आपराधिक मुद्दा दायर गर्ने योजना घोषणा गरेको छ। महासङ्घले एक विज्ञप्ति जारी गर्दै यी टिप्पणीहरू आपराधिक र निन्दनीय भएको र यसउपर कानुनी कारबाही हुनुपर्ने जनाएको छ।
कानुनी प्रक्रिया अगाडि बढाउने उद्देश्यका साथ एफएफएफले यस मामिलाबारे सरकारी वकिलको कार्यालयमा रिपोर्ट गरिरहेको छ। यस्ता टिप्पणीले ती व्यक्ति र यसलाई फैलाउनेहरूलाई लज्जित बनाउने महासङ्घले उल्लेख गरेको छ। फ्रान्सेली राष्ट्रिय टोलीका खेलाडीहरूले फ्रान्सको प्रतिनिधित्व गर्ने भएकाले यो अपमान आफ्नो देशको भएको महासङ्घको भनाइ छ।
शनिबारको खेलको दोस्रो हाफमा एम्बाप्पेले पेनाल्टी मार्फत निर्णायक गोल गरेका थिए। यस जितसँगै फ्रान्सले बिहीबार बोस्टनमा मोरक्कोविरुद्ध क्वार्टरफाइनल खेल्ने तय गरेको छ। यस वर्षको प्रतियोगितामा सात गोलसहित एम्बाप्पे अर्जेन्टिनाका लियोनेल मेस्सी र नर्वेका अर्लिङ हालान्डसँगै संयुक्त रूपमा शीर्ष गोलकर्ता रहेका छन्।
सांसद आमारियाको टिप्पणीअघि पाराग्वेका पूर्व गोलरक्षक जोसे लुइस चिलाभर्टले पनि खेलको पूर्वसन्ध्यामा आफ्नो टोलीले अफ्रिकाको टोलीसँग सामना गरिरहेको बताएका थिए। उक्त टिप्पणीको पनि एफएफएफका अध्यक्ष फिलिप डियालोले जवाफ दिँदै चिलाभर्टलाई कलङ्क भनेका छन्।
चिलाभर्टले फ्रान्सेली राष्ट्रिय टोलीविरुद्ध गरेको रङ्गभेदी टिप्पणीको आफूले कडा शब्दमा निन्दा गर्ने भन्दै डियालोले यसले फुटबलमा रहेको सम्मान, बन्धुत्व र विविधताको मूल्यलाई कमजोर पार्ने बताएका छन्। कुनै समय महान् गोलरक्षक रहेका यी व्यक्ति अहिले कलङ्कित बनेको डियालोले उल्लेख गरेका छन्।
