काठमाडौं, १८ साउन । लगभग हरेक घरमा दैनिकजसो रोटी बनाइन्छ । रोटीबिना खाना अपूरो जस्तो लाग्छ। धेरै घरहरूमा देखिने एउटा सामान्य समस्या के हो भने बिहान बनाइएका नरम रोटीहरू छिट्टै कडा र सारो हुन्छन्। विशेष गरी लन्च बक्समा राख्नु पर्ने वा पछि खानुपर्ने अवस्थामा यो समस्या निकै झन्झटिलो हुन्छ। वास्तवमा, हावाको सम्पर्कमा आउँदा रोटीभित्रको चिसोपन उडेर जाने भएकाले रोटी कडा हुन्छन्।
तर, के तपाईंलाई थाहा छ, रोटी बनाइ सके लगत्तै सही तरिकाले भण्डारण गर्दा ती घण्टौँसम्म नरम र स्वादिलो रहन सक्छन् । यसका लागि तपाईंलाई कुनै विशेष उपकरणको आवश्यकता पर्दैन, केवल केही सजिला उपायहरू अपनाए पुग्छ।
पहिलो र सबैभन्दा महत्त्वपूर्ण चरण भनेको रोटी तातो हुँदै सफा सुतीको कपडामा बेर्नु हो। तावाबाट रोटी निकाल्ने बित्तिकै त्यसलाई बाक्लो सुतीको कपडा भित्र राखेर राम्रोसँग छोप्नुपर्छ। यसो गर्दा कपडाले बाफलाई भित्रै रोकेर राख्छ, जसले गर्दा रोटीमा ओसिलोपन कायम रहन्छ र यो लामो समयसम्म नरम रहन्छ।
साथै, रोटी बनाउँदा थोरै घिउ वा बटर लगाउनु पनि लाभदायक हुन्छ । घिउले स्वाद बढाउनुका साथै रोटीको सतहमा एउटा पातलो तह बनाउँछ, जसले ओसिलोपन बाहिर जानबाट रोक्छ। जसलाई घिउ मन पर्दैन, उनीहरूले रोटीमा थोरै पानी छर्कन सक्नुहुन्छ, यसले रोटीलाई नरम राख्न पनि मद्दत गर्छ।
दोस्रो उपाय भनेको हट केसको प्रयोग गरेर रोटीलाई घण्टौँसम्म तातो राख्न सकिन्छ। रोटी पकाइसके पछि अब हट केस वा क्यासरोलमा राख्नु होस्। बजारमा पाइने हट केसहरूले भित्री ताप र बाफलाई राम्रोसँग जोगाएर राख्छन्, जसले गर्दा रोटी घण्टौँसम्म तातो र नरम रहन्छ। हट केसमा राख्नु अघि रोटीलाई कपडाले बेर्दा अझ राम्रो नतिजा पाइन्छ।
यदि तपाईं टिफिनमा रोटी राख्दै हुनुहुन्छ भने तिनलाई एल्युमिनियम फइलमा बेर्नुहोस्, यसले बाफलाई भित्रै थुनेर राख्छ, जसले गर्दा रोटी बेलुकासम्म नरम रहन्छ। रोटीहरूलाई सीधै एक अर्काको माथि नराख्नुहोस् । बरु, हावा पस्न नदिन र ओसिलोपन कायम राख्न प्रत्येक रोटीको बीचमा पातलो कपडा वा फइलको पत्र राख्नु होस्। साथै, रोटीलाई कहिल्यै पनि खुला हावा वा पंखाको मुनि नछोड्नु होस् किनकि हावाको सम्पर्कमा आउँदा ती धेरै छिटो सुक्छन्।
तेस्रो र अन्तिम महत्त्वपूर्ण कुरा भनेको रोटीलाई नछोपी सिधै फ्रिजमा नराख्नु हो । फ्रिज भित्रको चिसो र सुख्खा हावाले रोटीको ओसिलोपन सोसिदिन्छ, जसले गर्दा ती छिट्टै कडा हुन्छन्। यदि तपाईं केही घण्टाभित्रै रोटी खाने योजनामा हुनुहुन्छ भने तिनलाई सामान्य तापक्रममा कुनै ‘थर्मल कन्टेनर’ अर्थात तातोपन कायम राख्ने भाँडोमा वा कपडामा बेरेर राख्न सक्नु हुन्छ।
तर, यदि तपाईं पछि खाने सोचमा हुनुहुन्छ भने तिनलाई कपडामा बेरेर हावा नछिर्ने भाँडो अर्थात एयरटाइट कन्टेनरमा राखी फ्रिजमा भण्डारण गर्न सक्नुहुन्छ र खानु अघि हल्का तताउन सक्नुहुन्छ। यस्ता साना कुराहरूमा ध्यान दिँदा रोटी घण्टौँसम्म ताजा, नरम र स्वादिलो रहन्छ, जसले गर्दा खानाको वास्तविक आनन्द कायम रहन्छ।
