काठमाडौं, १७ कात्तिक । सर्वोच्च अदालतका न्यायाधीश हरिप्रसाद फुयाल बिदामा बसेका छन् ।
बिचौलिया इनम सापकोटासँगको संवाद र भेटको विषयलाई लिएर उनी विवादमा तानिएका थिए । यस विषयमा सत्तारूढ दल रास्वपाको सचिवालय वैठकले संसदीय दललाई प्रक्रिया थाल्न निर्देशनसमेत दिइसकेको छ ।
सर्वोच्चका प्रवक्ता अशोक क्षेत्रीले न्यायाधीश फुयाल कात्तिक २० गतेसम्मका लागि बिदामा बसेको जानकारी दिए । फुयालले मंगलबारबाट लागू हुनेगरी बिदा लिएका हुन् ।
बिदामा बस्नुको कारण भने खुलेको छैन । सर्वोच्चको मुद्दा पेसी सूचीमा न्यायाधीश फुयाललाई इजलास तय भएको छैन ।
न्यायपालिकासम्बन्धी समसामयिक विषयमा निर्णय लिन सोमबार बसेको सर्वोच्च अदालतको फुलकोर्ट बैठकले विवादमा परेका न्यायाधीशमाथि छानबिन गर्न सम्बद्ध निकायलाई आग्रह गर्ने निर्णय लिएको थियो ।
बिचौलिया सापकोटामा बयानमा मुछिएपछि अर्की न्यायाधीश सारंगा सुवेदीले सोमबार इजलासमा बसिनन् ।
बिचौलिया सापकोटा प्रधानमन्त्री बालेन्द्र शाह बालेन निकट व्यक्ति हुन् । गत फागुन २१ को निर्वाचनमा सापकोटाले बालेनको प्रचारप्रसार गरेका थिए । उनै इनमले प्रधानमन्त्री बालेनको नाम लिँदै न्यायाधीशहरूलाई भेट्ने गरेको खुलेको छ ।
