काठमाडौं । तीनकुनेको एक घरमा आगजनी भएको छ। राजावादीको प्रदर्शन र सभा बिथोलिएको केहीबेरमा घरमा आगजनी भएको हो ।
यसअघि यही घरमा राजावादीहरुको प्रदर्शनमा सहभागीहरुले तोडफोड गरेका थिए । सोही घर माथि रहेका प्रहरीले अश्रुग्याँस प्रहार गरेको थियो ।
एक प्रत्यक्षदर्शीले भने, ‘त्यहाँ प्रदर्शनकारीले पनि ढुंगा हानेका थिए । केहीबेरमा माथिबाट कागज झरेको जस्तो देखिन्थ्यो । अनि केही पड्किएको पनि सुनियो । एकछिनमै ह्वारह्वारती आगो बलेको देखियो ।’
आगो बलेर धुवाँको मुस्लो निस्किएको धेरैबेरपछि मात्र आगो निभाउन दमकल पुगेको थियो । सो दमकलमाथि पनि प्रदर्शनकारीले ढुंगामुढा गरिरहेका छन् ।
प्रहरीले माइकिङ गर्दै संयमित हुन आह्वान गरिरहेको छ । रमिता नहेर्न र आ–आफ्नो घर जान भनिरहेको छ ।
