प्योङयाङ । उत्तर कोरियामा युद्धपोत लन्च गर्ने क्रममा भयानक दुर्घटना भएको छ । उक्त समारोहमा किम जोङ उन पनि थिए । किमकै सामु डुबेको युद्धपोत ५ हजार टनको थियो ।
लन्च गर्ने समयमा युद्धपोतमा प्राविधिक समस्या उत्पन्न हुन थालेको र समारोह चलिरहँदा केही समयमै ठुलो दुर्घटना भएको बताइएको छ । यो घटनापछि उक्त कार्यक्रममा उपस्थित मानिसहरू डराए ।
दुर्घटनामा कुनै पनि मानवीय क्षति भएको जानकारी आएको छैन । उत्तर कोरियाको सरकारी सञ्चारमाध्यमका अनुसार किम जोङ उनले सम्पूर्ण घटनालाई आपराधिक कार्य भनेका छन् ।
बुधबार चोङजिन शहरको पूर्वी बन्दरगाहमा नयाँ ५ हजार टनको युद्धपोतको प्रक्षेपण समारोहमा ठुलो दुर्घटना भएको भन्दै कोरियाली केन्द्रीय समाचार एजेन्सी (केसीएनए)ले बिहीबार समाचारमा भनेको छ । केसीएनएका अनुसार युद्धपोत मुनिका केही भागहरू दुर्घटनाग्रस्त भएका थिए, जसले गर्दा युद्धपोतको सन्तुलन बिग्रियो । यो सम्पूर्ण घटना किम जोङ उनको अगाडि भएको थियो ।
किमले अनुभवहीन कमान्ड र सञ्चालन लापरबाहीको दोष लगाउँदै दुर्घटनालाई आपराधिक कार्य भनेका छन् । साथै उनले यो अपराध सहन नसकिने चेतावनी पनि दिएका छन् ।
अर्को महिना पार्टीको केन्द्रीय समितिको पूर्ण बैठकमा यसबारे छलफल गरिने उनले भनेका छन् । गत महिना मात्र उत्तर कोरियाले चो ह्योन नामक ५ हजार टन क्षमताको युद्धपोत जहाज अनावरण गरेको थियो ।
