टेक्सास । टेक्सासका एक रुमेटोलोजिस्ट (जोर्नी तथा मांसपेशी रोग विशेषज्ञ) डा. जोर्ज सामोरा क्वेजाडालाई १० वर्षको जेल सजाय सुनाइएको छ। उनले सयौँ स्वस्थ व्यक्तिलाई गम्भीर रोग लागेको भन्दै गलत रूपमा निदान गरेर महँगो र खतरनाक उपचार दिँदै करोडौँ डलर ठगी गरेका थिए।
डा. जोर्ज सामोरा-क्वेजाडा, मिसन, टेक्सासका बासिन्दा हुन्। उनले स्वास्थ्य बीमा ठगीको षड्यन्त्र, फर्जी स्वास्थ्य दाबी, र न्यायमा बाधा पुर्याउने षड्यन्त्रको अभियोगमा दोष स्वीकार गरेका हुन् । उनलाई १० वर्षको जेल र तीन वर्षको निगरानीसहितको रिहाइको सजाय सुनाइएको हो।
अभियोजन पक्षले पेस गरेको प्रमाण अनुसार, ६८ वर्षीय डाक्टरले ११८ मिलियनभन्दा बढी रकमको गलत बीमा दबी गरेका थिए, जसअन्तर्गत $२८ मिलियनभन्दा बढी रकम बीमा कम्पनीहरूले तिरेका थिए। यो पैसाबाट उनले विलासी जीवनशैली अपनाएका थिए—जसमा १३ ओटा रियल स्टेट सम्पत्ति, एक निजी जेट, र मासेराटी ग्रान टुरिज्मो जस्ता महँगा सम्पत्तिहरू समावेश छन्।
अमेरिकी न्याय मन्त्रालयका आपराधिक विभाग प्रमुख म्याथ्यु आर. गालिओटीले भने, ‘डा. सामोरा-क्वेजाडाले आफ्ना बिरामीलाई शारीरिक तथा मानसिक रूपमा पीडित बनाउँदै, कर्मचारीलाई दुर्व्यवहार गर्दै, बीमालाई झूट बोलेर र करदाताको पैसा चोरेर दुई दशकसम्म आफ्नो विलासी जीवन बिताए।’
उनको सुनुवाइको क्रममा, टेक्सासका अन्य रुमेटोलोजिस्टहरूले प्रमाण दिएका थिए जसमा सयौँ बिरामीहरू, जसलाई डा. सामोराले रुमेटोइड आर्थराइटिस भएको भन्दै औषधि दिएका थिए, वास्तवमा तिनीहरू पूर्ण रूपमा स्वस्थ थिए। यस्ता बिरामीहरूलाई शक्तिशाली औषधिहरू दिइन्थ्यो, जसका कारण स्ट्रोक, चिउँडोको हड्डी कमजोर हुने, कपाल झर्ने, कलेजो बिग्रने, र अत्यधिक पीडा जस्ता गम्भीर असर देखिएको थियो।
एक पीडितले भने, ‘सधैँ बिछ्यौनामा बस्नुपर्ने, आफै उठ्न नसक्ने र औषधिले शरीरभर असर पार्दा म आफ्नो जीवनको कुनै अर्थ छैन जस्तो महसुस गर्थें।’
डा. सामोरा-क्वेजाडाले जे-१ भिसामा आएका कर्मचारीहरूलाई धम्क्याएर आफ्नो पक्षमा राख्थे—जसले उनीहरूको आप्रवासन स्थिति जोखिममा पार्थ्यो। जो उनको आज्ञा मान्दैन थिए, उनीहरूलाई हटाइन्थ्यो। साथै, उनले आफ्ना कर्मचारीहरूलाई अनावश्यक परीक्षण र उपचार गर्न बाध्य पार्थे।
उनका बिरामीहरूमा १३ वर्षसम्मका बालबालिका पनि थिए, र टेक्सास र सान एन्टोनियोमा रहेका उनका क्लिनिकहरूले सयौँलाई पीडित बनाएका थिए। धेरै पीडितहरूले अझै पनि ती गलत उपचारका कारण स्वास्थ्य समस्या झेलिरहेका छन् । अब भने उनीहरूले न्याय पाएका छन्।
उनीमाथि सुनाइएको सजायलाई १० वर्षको जेल, ३ वर्षको निगरानीमा रिहाइ २८,२४५,४५४ डलर बराबरको क्षतिपूर्ति तिर्नु पर्ने, जसमा उनका १३ सम्पत्ति, निजी जेट, र विलासी कारहरू समावेश छन्।
यो घटना एउटा चेतावनी पनि हो—जब चिकित्सा व्यवसायमा मानवीय मूल्यभन्दा लालच ठूलो बन्न जान्छ, त्यसले कति निर्दोष जीवनहरू तहसनहस हुन सक्छन्।
