भारत केन्द्र सरकारले दिल्लीकी मुख्यमन्त्री रेखा गुप्तालाई जेड श्रेणीको भिआईपी सुरक्षा प्रदान गरेको छ। मुख्यमन्त्रीको सुरक्षामा २२ देखि २५ जना हतियारधारी सैनिक २४ घण्टा तैनाथ गरिने छ।
गुप्ता र उनको आधिकारिक निवासको सुरक्षा अर्धसैनिक बलको भीआईपी सुरक्षा समूहले गर्ने छ। यो समूह केन्द्रीय गृहमन्त्री अमित शाह र सोनिया-राहुल र प्रियंका गान्धीको सुरक्षामा पनि तैनाथ छ।
अगस्ट २० मा बिहान ८:१५ बजे सार्वजनिक सुनुवाइको क्रममा एक व्यक्तिले मुख्यमन्त्री रेखामाथि आक्रमण गरेका थिए। अभियुक्त राजकोट, गुजरातका निवासी राजेशभाई खिमजी हुन्, उनलाई तुरुन्तै पक्राउ गरिएको थियो।
आरोपीलाई बुधबार राति दक्षिण-पश्चिम दिल्लीको द्वारकामा एक मजिस्ट्रेट समक्ष पेस गरिएको थियो। त्यसपछि उनलाई ५ दिनको प्रहरी हिरासतमा पठाइएको छ। राजेशविरुद्ध हत्या प्रयासको मुद्दा दर्ता गरिएको छ।
राजेशविरुद्ध गुजरातमा छुरा प्रहारसहित ५ वटा मुद्दा दर्ता भइसकेका छन्। यद्यपि, पक्राउ पर्दा उनीसँग कुनै हतियार भेटिएको छैन। खुफिया ब्यूरो र दिल्ली प्रहरीको विशेष सेलले उनलाई सोधपुछ गरिरहेको छ।
सार्वजनिक सुनुवाइमा उजुरीकर्ताको रूपमा आएका राजेशले मुख्यमन्त्री रेखालाई कागजात दिँदै गर्दा आक्रमण गरेका थिए। आक्रमणमा घाइते भएकी मुख्यमन्त्री रेखाको हात, काँध र टाउकोमा चोट लागेको छ। हाल उनी घरबाटै काम गरिरहेकी छिन्।
आक्रमण हुनुभन्दा अगाडि आरोपी राजेशभाईले मुख्यमन्त्री रेखा गुप्ताको शालिमार बागस्थित निवासको रेकी गरेका थिए। अगस्ट १९ मा मुख्यमन्त्री निवासमा जडान गरिएका सीसीटीभी क्यामेरामा अभियुक्त देखिएका थिए। सीसीटीभी फुटेजमा उनी फोनमा कसैसँग कुरा गरिरहेको देखियो। त्यसपछि उनी मुख्यमन्त्री निवास बाहिर फोनबाट निरन्तर रेकर्डिङ गरिरहेको देखियो।
अर्को सीसीटीभी फुटेजमा उनी मुख्यमन्त्रीको निजी निवासको कार्यालयभित्र बसेर भिडियो रेकर्ड गरिरहेको देखिएको छ। स्रोतले बताएअनुसार अभियुक्तको मोबाइल फोनबाट सार्वजनिक सुनुवाइ कार्यक्रमका दुई भिडियोहरू पनि बरामद गरिएको छ।
