कुवेत । कुवेतको अदालतले सार्वजनिक क्षेत्रमा तलब ठगीसम्बन्धी हालैका वर्षहरूमा सबैभन्दा कडा फैसला सुनाउँदै एक निजामती कर्मचारीलाई पाँच वर्षको जेल सजाय तोकेको छ।
साथै, उनलाई ३ लाख १२ हजार कुवेती दिनार (करिब १ मिलियन अमेरिकी डलर) जरिवाना तिर्न आदेश दिएको छ। ती कर्मचारीले काममा अनुपस्थित रहेर पनि करिब दश वर्षको तलब सार्वजनिक कोषबाट गैरकानूनी रूपमा लिएको पाइएको थियो।
अदालतका कागजातहरूले ती निजामती कर्मचारी नागरिक सेवा विभागमा कार्यरत भए पनि पछिल्लो १० वर्षदेखि काममा नगई तलब बुझिरहेको देखाएका छन्। उनी आफ्नो कार्यस्थलमा अनुपस्थित थिए र कुनै पनि कामको जिम्मेवारी निर्वाह गरेका थिएनन्, तर उनको तलब भने हरेक महिना बैंक खातामा जम्मा भइरहेको थियो। यो अनियमितता पत्ता लागेपछि अधिकारीहरूले गैरकानूनी सम्पत्ति आर्जन र सार्वजनिक कोषको दुरुपयोग गरेको भन्दै उनीविरुद्ध फौजदारी मुद्दा दायर गरेका थिए।
यसअघि अन्य दुई अदालतले ती कर्मचारीलाई सफाइ दिए पनि अदालतको ‘कोर्ट अफ क्यासेसन’ ले ती फैसलाहरू उल्टाउँदै व्यक्तिविरुद्धको प्रमाणहरूलाई अकाट्य मानेको थियो। पाँच वर्षको जेल सजायका अतिरिक्त, ती कर्मचारीलाई बुझेको तलब १ लाख ४ हजार कुवेती दिनार फिर्ता गर्न र त्यसको दोब्बर रकम जरिवाना स्वरूप तिर्न आदेश दिइएको छ।
अरबी पत्रिका अल काबास अनुसार, यो फैसला हालैका वर्षहरूमा जारी गरिएकामध्ये सबैभन्दा कडा हो र यो कुवेतले तलब ठगी र प्रशासनिक भ्रष्टाचार विरुद्ध गरिरहेको गहन प्रयासहरूका बिच आएको छ।
