विराटनगर । विराटनगरमा ‘प्रहरी हौं’ भन्दै लुटपाट गरेको आरोप दुईजना पक्राउ परेका छन् । पक्राउ पर्नेमा विराटनगर–१ पानीट्यांकीका ३८ वर्षीय दीपक तामाङ र विराटनगर–४ खारजीका ३६ वर्षीय सुनील थापा रहेका छन् ।
तामाङ बुधबार र थापालाई बिहीबार बिहान पक्राउ गरिएको जिल्ला प्रहरी कार्यालय मोरङले जनाएको छ । दुवै जनालाई विराटनगर–१ स्थित धनावत पुलनजिकबाट पक्राउ गरिएको प्रहरीले जनाएको छ ।
मोरङ प्रहरीका प्रहरी हौं भन्दै दुई जनाले विराटनगर महानगरपालिका–१२ रानीका रविकुमार साह सुडीमाथि लुटपाट गरेका थिए । पीडित साहबाट बिमा तिर्न र बैंकमा जम्मा गर्न ल्याएको १२ लाख रूपैयाँ लुटपाट भएको बताइएको छ ।
असोज २२ गते सोमबार दिउँसो १२ बजे मोटरसाइकलमा रानीबाट विराटनगर बजारतिर आउँदै गर्दा साह लुटिएको बताइएको छ । बहालवाला प्रहरी हौं भन्दै लुटपाट गर्ने तामाङ र थापा दुवै जना पूर्वप्रहरी रहेको प्रारम्भिक अनुसन्धानबाट खुलेको छ ।
