अमेरिकी राष्ट्रपति डोनाल्ड ट्रम्पले रुसबाट सस्तो तेल खरिद गरिरहेको विषयलाई लिएर भारतलाई कडा चेतावनी दिएका छन्। भेनेजुएलासम्बन्धी घटनाक्रमपछि सार्वजनिक रूपमा प्रतिक्रिया दिँदै ट्रम्पले यदि भारतले रुसी तेल खरिदलाई निरन्तरता दिएमा थप ट्यारिफ लगाइने संकेत गरेका हुन्। उनले रुसविरुद्ध प्रस्तावित प्रतिबन्ध विधेयकको समर्थन गर्दै यस्तो चेतावनी दिएका हुन्।
ट्रम्पका अनुसार ट्यारिफको धम्कीका कारण भारतले केही हदसम्म रुसी तेल आयात घटाइसकेको छ। उनले भने, रुसको ऊर्जा क्षेत्रबाट हुने आम्दानी नै राष्ट्रपति भ्लादिमिर पुटिनको युद्ध संयन्त्रको मुख्य आधार भएकाले त्यसलाई कमजोर पार्न आर्थिक दबाब आवश्यक छ। रुसी तेल खरिद गर्ने देशहरूलाई ‘कठिन निर्णय’ लिन बाध्य पार्न ट्यारिफ प्रभावकारी माध्यम भएको ट्रम्पको भनाइ छ।
उनले ट्यारिफलाई अमेरिकी व्यापार र परराष्ट्र नीतिको शक्तिशाली उपकरणका रूपमा वर्णन गर्दै आवश्यक परे छिटो र कडा रूपमा प्रयोग गर्न सकिने बताए। ट्रम्पले भारत–अमेरिका व्यापार सम्बन्धमा अब थप व्यवहारिक र लेनदेनमुखी दृष्टिकोण अपनाइने संकेत पनि गरेका छन्।
यद्यपि, ट्रम्पले भारतीय प्रधानमन्त्री नरेन्द्र मोदीलाई व्यक्तिगत रूपमा ‘राम्रो मान्छे’ भन्दै प्रशंसा पनि गरे। तर, वाशिङ्टन असन्तुष्ट भएमा भारतमाथि ट्यारिफ तत्काल बढ्न सक्ने चेतावनी दिँदै उनले मित्रता र व्यापार नीतिलाई अलग–अलग रूपमा हेर्ने संकेत गरे।
ट्रम्पको यो अभिव्यक्तिले भारत–अमेरिका सम्बन्धमा नयाँ दबाब सिर्जना गरेको छ भने रुस–युक्रेन युद्धसँग जोडिएको ऊर्जा राजनीति अझ जटिल बन्दै जाने देखिएको छ।
