नयाँ दिल्ली । विमानको इन्जिन कार्गो कन्टेनरमा फसेको घटनामा भारतीय उड्डयन नियामकले छानबिन सुरु गरेको छ । इरानले केही समयका लागि आफ्नो हवाई क्षेत्र बन्द गरेपछि दिल्लीस्थित विमानस्थलबाट न्यूयोर्कका लागि उडेको एयर इन्डियाको विमान बिहीबार उडेको केही समयपछि नै विमानस्थलमा फर्किएको थियो ।
अवतरण सुरक्षित रुपमा गरेपछि विमान धावनमार्गबाट पार्किङ स्थलतिर गयो । विमानभित्र करिब २४० जना यात्री थिए । विमानभित्र कति जना क्रु मेम्बर थिए भन्ने कुरा स्पष्ट छैन ।
यस क्रममा विमानको दाहिने इन्जिन कार्गो कन्टेनरमा अड्कियो । सो समयमा विमानस्थलमा बाक्लो कुहिरो भएकोले भिजिबिलिटी कम भएको नागरिक उड्डयन महानिर्देशनालय (डीजीसीए)को भनाइ छ ।
घटना स्थानीय समयअनुसार बिहान ५ः २५ तिरको भएको बताइएको छ । कार्गो कन्टेन्टर जमिनमा कार्गो तानिरहेको सवारी साधनबाट अचानक खसेको बताइएको छ ।
विमानस्थलभित्र सामान र कार्गाे ओसारपसार गर्न प्रयोग गरिने गाडीले तानिरहेको कार्टबाट पाङ्ग्रा निस्किएपछि कार्गो कन्टेनर खसेको एयर इन्डियाका प्रवक्ताले बताएका छन् ।
विमानलाई पार्क गर्दै गरेको देखेपछि गाडीका चालक गएका थिए । ‘यद्यपि, खसेको कन्टेनर पछाडि छोडियो र यो विमानको नम्बर २ इन्जिनमा पस्यो,’ एयर इन्डियाले भनेको छ ।
