नयां दिल्ली । भारतीय वायुसेना (आईएएफ) को एक हल्का लडाकु विमान तेजस अवतरणका क्रममा धावनमार्गबाट चिप्लिएको छ।
समाचार एजेन्सी एएनआईले स्रोतलाई उद्धृत गर्दै घटना फेब्रुअरी ७ मा भएको तर खुलासा अहिले भएको जनाएको छ।
प्रारम्भिक अनुसन्धानमा ब्रेक फेल भएका कारण विमानले धावनमार्ग छाडेको देखिएको छ।
विमान प्रशिक्षण उडानपछि एयरबेसमा फर्किरहेको थियो। अवतरण गर्दा पाइलटले ब्रेक लगाउने प्रयास गरे। तर ब्रेक फेल हुँदा विमान धावनमार्गबाट बाहिर गएको हो।
पाइलट भने दुर्घटना हुनुभन्दा पहिले सुरक्षित रूपमा बाहिर निस्कन सफल भए। विमानमा क्षति पुगेको छ। दुर्घटना भएको ठ्याक्कै एयरबेस अहिले थाहा हुन सकेन।
स्रोतका अनुसार घटनापछि भारतीय वायुसेनाले लगभग ३० सिंगल-सिट तेजस जेटको सम्पूर्ण फ्लिटलाई प्राविधिक निरीक्षणका लागि ग्राउन्डेड गरेको छ।
यसको अर्थ अनुसन्धान पूरा नभएसम्म विमान उडाइने छैन। दुर्घटनाबारे आईएएफबाट अहिलेसम्म कुनै प्रतिक्रिया आएको छैन।
यो तेजस जेट दुर्घटना भएको तेस्रोपटक हो।
यसअघि २०२४ मार्चमा तेजस जेट जैसलमेर नजिकै दुर्घटना भएको थियो। यसपछि फेरि २०२५ नोभेम्बरमा दुबई एयरसोका क्रममा तेजस जेट दुर्घटना भएको थियो।
