काठमाडौँ । काठमाडौँको वसन्तपुर क्षेत्रमा एक वृद्ध व्यक्तिमाथि हातपात गर्ने युवकलाई प्रहरीले पक्राउ गरेको छ। सामाजिक सञ्जालमा घटनासम्बन्धी भिडियो भाइरल भई सर्वत्र चासो र विरोध भएपछि जिल्ला प्रहरी परिसर काठमाडौँले ती युवकलाई नियन्त्रणमा लिएको हो।
भाइरल भएको उक्त भिडियोमा ती युवकले वृद्धलाई गालीगलौज गर्दै भौतिक रूपमै कुटपिट गरेको देखिन्छ। घटनास्थलमा उपस्थित काठमाडौँ महानगरपालिकाका नगर प्रहरीले उनीहरूलाई छुट्याउने र विवाद साम्य पार्ने प्रयास गरेका थिए। तर, नगर प्रहरीकै अगाडि पनि ती युवक निकै आक्रामक रूपमा प्रस्तुत भएको भिडियोमा प्रस्ट देख्न सकिन्छ।
घटना कुन विषयलाई लिएर भएको हो भन्ने खुल्न सकेको छैन। विवादका क्रममा ती आक्रामक युवकले कुनै परिचयपत्र निकालेर देखाएको भिडियोमा देखिए पनि त्यो परिचयपत्र केको थियो भन्नेबारे प्रहरीले केही खुलाएको छैन।
पक्राउ परेका युवकमाथि अहिले आवश्यक सोधपुछ तथा थप अनुसन्धान भइरहेको प्रहरीले जनाएको छ।
