लस एन्जलस । विश्वकप फुटबल सुरु हुन ४० दिनभन्दा कम समय बाँकी रहँदा टिकटको अचाक्ली मूल्यका कारण आयोजकहरूले दर्शक पाउन संघर्ष गरिरहेका छन्।
फिफाले अघि सारेको डायनामिक प्राइसिङ (माग अनुसार मूल्य घटबढ हुने प्रणाली) र अत्यधिक महँगो टिकटका कारण आम फुटबल प्रेमीहरू विश्वकप हेर्नबाट बञ्चित हुने अवस्था सिर्जना भएको हो।
सह-आयोजक संयुक्त राज्य अमेरिका र पाराग्वेबिच जुन १२ मा लस एन्जलसमा हुने उद्घाटन खेलको टिकट मूल्य नै ११२० डलरबाट सुरु भएर ४१०५ डलरसम्म पुगेको छ। हस्पिटालिटी प्याकेजका सिटहरूको मूल्य त प्रतिसिट ६०५० डलरसम्म तोकिएको छ।
फिफाको आधिकारिक रिसेल साइटमा फाइनल खेलका चारवटा सिटको मूल्य प्रतिसिट झण्डै २० लाख डलरसम्म सूचीकृत गरिएको पाइएको छ।
फिफाका अध्यक्ष जियानी इन्फान्टिनोले यसअघि अमेरिका, क्यानडा र मेक्सिकोमा हुने यस विश्वकपको माग १००० वर्षको विश्वकप बराबर हुने दाबी गरेका थिए। तर, वास्तविकतामा टिकट बिक्री सुस्त देखिएको छ।
विज्ञहरूका अनुसार फिफाको लोभ र अमेरिकी बजारमा प्रचलित महँगो मूल्य प्रणालीलाई विश्वव्यापी बनाउने प्रयासले यो अवस्था आएको हो। लिभरपुलका पूर्व प्रमुख कार्यकारी पिटर मोरले फिफाले डायनामिक प्राइसिङबाट ३० प्रतिशत कमिसन लिनुलाई अपमानजनक भनेका छन्।
हालसम्म १७ वटा समूह चरणका खेलहरू मात्र सोल्ड आउट भएका छन्, जसमा मेक्सिकोमा हुने खेलहरूको संख्या बढी छ। मेक्सिको र दक्षिण अफ्रिकाबीचको उद्घाटन खेलका साथै ब्राजिल, अमेरिका र स्कटल्याण्डका केही खेलका टिकटहरू सकिएका छन्। यद्यपि, अस्ट्रिया र जोर्डन, न्युजिल्याण्ड र इजिप्ट जस्ता सातवटा खेलका टिकटहरू भने अझै ३८० डलरको सामान्य दरमा उपलब्ध छन्।
फिफाले ११ अर्ब डलरभन्दा बढी राजस्व उठाउने लक्ष्य राखेको छ। तर, फुटबल फ्यानहरूले भने फिफाले पैसा कमाउने दाउमा खेललाई सर्वसाधारणको पहुँचभन्दा टाढा पुर्याएको भन्दै सामाजिक सञ्जालमा आक्रोश पोखिरहेका छन्। मेक्सिकोमा हुने खेलहरूमा देखिएको उत्साहको तुलनामा अमेरिकामा हुने खेलहरूमा टिकटको मूल्य नै मुख्य अवरोध बनेको देखिन्छ।
