काठमाडौँ । मलेसियामा सेक्युरिटी गार्डको काम गर्न जान लागेका सप्तरीका अजय कुमार यादव अन्ततः ठगीको सिकार हुनबाट जोगिएका छन् । ‘फ्रि भिसा, फ्रि टिकट’ नीतिअनुसार अधिकतम १० हजार रुपैयाँ मात्रै खर्च लाग्नुपर्ने अवस्थामा म्यानपावर कम्पनीले उनीसँग ३ लाख रुपैयाँ मागेपछि उनको विदेश जाने सपना संकटमा परेको थियो ।
कोटेश्वरस्थित ग्रान्ड स्विट जब नामक म्यानपावर कम्पनीले बाँकी २ लाख २० हजार रुपैयाँ नदिए विदेश पठाउन नसकिने बताएपछि यादवले यसअघि नै ७० हजार रुपैयाँ बुझाइसकेका थिए । रोजगारदाता कम्पनीले भिसा र टिकट पठाइसकेको भए पनि रकम अभावमा उनी निर्धारित मितिमा मलेसिया जान सकेनन् ।
म्यानपावर कम्पनीले पैसा लिएपछि मात्रै राहदानी, श्रम स्वीकृति र हवाई टिकट दिने बताएपछि यादव शनिबार बिहान रकमको जोहो गरेर काठमाडौं आएका थिए । कम्पनीका एक कर्मचारीले उनलाई तीनकुनेस्थित गैरीगाउँमा रहेको पेट्रोलपम्प नजिक पैसा लिएर आउन फोनमार्फत बोलाएका थिए ।
यसबीच यादवले आफूले भोगेको समस्याबारे युवा, श्रम तथा रोजगार मन्त्री रामजी यादवको सचिवालयलाई जानकारी गराएका थिए । त्यसपछि मन्त्रीका स्वकीय उपसचिव सरोज यादव प्रहरी र सञ्चारकर्मीसहित घटनास्थल पुगेका थिए ।
अजय र म्यानपावरका कर्मचारीबीच कागजात र रकमको विषयमा भनाभन भइरहेका बेला प्रहरीले ती कर्मचारीलाई नियन्त्रणमा लिएको थियो । पक्राउ परेका व्यक्तिले आफू ग्रान्ड स्विट जबको भिसा शाखामा कार्यरत रहेको बताएका थिए ।
प्रहरीले सोधपुछ गर्दा ‘फ्रि भिसा, फ्रि टिकट’ अन्तर्गत जान लागेका कामदारसँग ३ लाख रुपैयाँ मागिएको स्वीकारेपछि उनलाई थप अनुसन्धानका लागि काठमाडौं उपत्यका अपराध अनुसन्धान कार्यालय पठाइएको छ ।
पक्राउ परेका व्यक्तिको साथबाट चारवटा राहदानी, फ्लाइट टिकट र अन्य महत्वपूर्ण कागजात बरामद भएको प्रहरीले जनाएको छ । उनीहरूले विभिन्न कामदारसँग रकम असुल्ने उद्देश्यले कागजात रोकेर राखेको प्रारम्भिक अनुसन्धानबाट खुलेको छ ।
श्रममन्त्री यादवका स्वकीय उपसचिव सरोज यादवले वैदेशिक रोजगारीका नाममा हुने ठगी रोक्न आफूहरू सक्रिय रहेको बताए । उनले भने, “आज एक जना सोझो नेपाली ठगिनबाट जोगिएका छन् । यस्तो कार्यमा संलग्नलाई कानुनी दायरामा ल्याउन प्रहरीसँग सहकार्य भइरहेको छ ।”
पीडित अजय यादवले म्यानपावर कम्पनीले सुरुमा कुनै अतिरिक्त शुल्क नलाग्ने बताए पनि भिसा आएपछि अचानक ३ लाख रुपैयाँ माग्दै दबाब दिएको गुनासो गरे । उनले भने, “गरिब परिवारबाट आएको मान्छेले ऋण खोजेर पैसा जुटाउनुपर्ने अवस्था आयो । यस्तो लुटधन्दा गर्नेहरूलाई कडा कारबाही हुनुपर्छ ।”
प्रहरीको पहलमा यादवको राहदानी, श्रम स्वीकृति, बिमा र हवाई टिकट फिर्ता गरिएपछि उनी आइतबार मलेसिया उड्ने तयारीमा रहेका छन् । घटनामा संलग्न व्यक्तिमाथि थप अनुसन्धान भइरहेको प्रहरीले जनाएको छ ।
