काठमाडौँ । क्यान्सर विश्वभर मृत्युका प्रमुख कारणमध्ये एक हो। प्रारम्भिक अवस्थामा स्पष्ट लक्षण नदेखिने भएकाले यो रोग समयमै पहिचान गर्न कठिन हुन्छ, जसका कारण धेरै बिरामीमा क्यान्सर अन्तिम चरणमा पुगेपछि मात्र पत्ता लाग्ने गर्छ।
हालै सार्वजनिक भएको एक प्रारम्भिक अनुसन्धानले इरेक्टाइल डिसफङ्क्शन (यौन दुर्बलता) को उपचारमा प्रयोग हुने औषधि भियाग्रा (सिल्डेनाफिल) ले क्यान्सर कोषहरूको फैलावट कम गर्न सक्ने सम्भावना देखाएको छ। यद्यपि अनुसन्धानकर्ताहरूले यसलाई प्रारम्भिक निष्कर्ष मात्र भएको भन्दै थप अध्ययन आवश्यक रहेको बताएका छन्।
वैज्ञानिकहरूका अनुसार सिल्डेनाफिलले फस्फोडिएस्टेरेज टाइप–५ (PDE5) नामक इन्जाइमलाई निष्क्रिय बनाउँछ। यसबाट शरीरमा सीजीएमपी (cGMP) नामक सिग्नलिङ अणुको मात्रा बढ्छ, जसले रक्तनलीहरू फराकिला बनाई रक्त प्रवाह सुधार गर्छ। यही प्रक्रियाले भियाग्रालाई प्रभावकारी बनाउने गर्छ।
अनुसन्धानमा सीजीएमपी एउटा यस्तो प्रोटिनसँग सम्बन्धित रहेको पाइएको छ, जसले कोषहरूभित्र कोलेस्ट्रोल पुर्याउने काम गर्छ। क्यान्सर कोषहरू फैलिनका लागि कोलेस्ट्रोल आवश्यक पर्ने भएकाले सिल्डेनाफिलले उक्त प्रक्रियामा हस्तक्षेप गर्दा क्यान्सर कोषले पर्याप्त कोलेस्ट्रोल नपाउन सक्छ। यसले क्यान्सर फैलिने क्षमता कमजोर पार्न सक्ने सम्भावना अनुसन्धानकर्ताहरूले औँल्याएका छन्।
यद्यपि विज्ञहरूका अनुसार यो अध्ययन अझै प्रारम्भिक चरणमै रहेको छ। त्यसैले भियाग्रालाई क्यान्सरको उपचार वा रोकथामको औषधिका रूपमा प्रयोग गर्न मिल्ने निष्कर्षमा पुग्न सकिने अवस्था छैन।
स्वास्थ्य विज्ञहरूले क्यान्सर भएका वा जोखिममा रहेका व्यक्तिले सामाजिक सञ्जालमा देखिएका अपुष्ट दाबीमा विश्वास गरेर औषधि सेवन नगर्न र कुनै पनि उपचार सुरु गर्नुअघि अनिवार्य रूपमा चिकित्सकको परामर्श लिन आग्रह गरेका छन्।
