मुम्बई, १ कात्तिक। अभिनेता राजपाल यादवले शनिबार सर्वोच्च अदालतप्रति आभार व्यक्त गरेका छन्।
उनीविरुद्ध चलिरहेको ‘चेक बाउन्स ‘ (भुक्तानी नभएको चेक) सम्बन्धी मुद्दामा उनलाई आफ्नो पक्ष राख्ने मौका दिएकोमा उनले अदालतलाई धन्यवाद दिएका हुन्।
भारतीय मिडियामा उल्लेख भए अनुसार राजपाल यादवले भने, “सबैभन्दा पहिले म सर्वोच्च अदालतलाई धन्यवाद दिन चाहन्छु, किनकि १४ वर्षपछि बल्ल मैले आफ्नो कुरा राख्ने अवसर पाएको छु। हामी सर्वोच्च अदालतको आदेशलाई जसरी पनि पालना गर्नेछौं। यो मुद्दा भारतीय इतिहासकै सबैभन्दा रोचक मुद्दा हो।”
राजपाल यादवले थपे, “तपाईंहरूले १२ देखि १४ वर्षसम्म एउटा पाटो मात्र देख्नुभयो तर अर्को पाटो नसुनीकन यो समस्या कसरी समाधान हुन सक्छ र ? यदि यो ५ करोडको कुरा हुन्थ्यो भने सायद मिलापत्र हुन सक्थ्यो होला। तर यहाँ त २२ करोडको कुरा छ, ५ करोडले २२ करोडलाई ‘सखाप’ पार्यो। र, २२ करोड डुबिसक्यो, म एक सार्वजनिक कलाकार हुँ, जो संसारभरका मानिसहरूसँग घुलमिल हुन्छु। तर, सुरुको दिनमै ममाथि तीनवटा आरोप लगाइएको थियो: राजपालले ५ करोडको ठगी गरे, राजपालले ऋण लिए र राजपालले एक व्यापारीलाई धोका दिए। जब मसँग चेकहरू उपलब्ध छन् भने मैले कसरी धोका दिएँ होला ? मलाई लाग्छ, जब यति धेरै सम्झौताहरू भएका छन् भने त्यहाँ धोकाधडीको कुनै प्रश्नै आउँदैन। अनि, जसले संसारभरका मानिसहरूको मन जितेको छ, उसले ५ करोडको ठगी गर्ला त ? यो त सरासर पागलपन हो।”
“अहिले हामीसँग मध्यस्थता (अदालतमा हुने सुनुवाइ प्रक्रिया) को अवसर छ। म मेरो पक्ष मध्यस्थतामा राख्नेछु; म सधैं जीवनमा एउटा टुंगो वा निर्णय चाहन्छु, र सबैजना यस्तै चाहन्छन्। तर दुवै पक्षको कुरा सुनेपछि जे निर्णय आउँछ, त्यो पहिले पनि स्वीकार्य थियो, आज पनि स्वीकार्य छ र भोलि पनि स्वीकार्य हुनेछ। एउटा रोचक कुरा: म सर्वोच्च अदालतलाई धन्यवाद दिन चाहन्छु जसले ‘अदालतमा कुनै नाटक हुँदैन’ भनेर स्पष्ट पार्यो। मैले ४२ वर्षसम्म अभिनय गरेको छु, त्यसैले मेरो अभिनयको भोक पूर्ण रूपमा मेटिइसकेको छ,” राजपाल यादवले भने।
“घटना त घटेको छ, तर यदि यो कुनै नाटक हो भने, कि त गभर्नरले नाटक रचिरहेका छन् वा विपक्षी पक्षले। जसले नाटक गरिरहेको छ, उसलाई पर्दाफास गरिनुपर्छ; किनकि म ‘रिल’ (चलचित्र) मा अभिनय गर्छु तर वास्तविक जीवनमा बाँच्छु। म वास्तविक जीवनसँग कहिल्यै खेलबाड गर्दिनँ, किनकि ‘रिल’ को दुनियाँमा मैले धेरै काम गर्ने अवसर पाइसकेको छु,” राजपाल यादवले थपे।
यस महिनाको सुरुमा, चेक बाउन्स (भुक्तानीका लागि दिइएको चेक अनादर हुने) मुद्दामा ताेकिएको रकम जम्मा गर्न असफल भएपछि सर्वोच्च अदालतको कडा चेतावनीसँगै अभिनेता राजपाल यादव आफैं अदालतमा उपस्थित भए। यादवले अदालतलाई आफूले २ करोड रुपैयाँ तिर्ने बताए र १ करोड १५ लाख रुपैयाँको ‘डिमान्ड ड्राफ्ट’ पनि प्रस्तुत गरे।
उनको सम्पत्ति खरिद गर्ने व्यक्ति, जसले बाँकी ८५ लाख रुपैयाँ तिर्नुपर्ने छ, उनी पनि अदालतमा उपस्थित थिए। भारतका प्रधानन्यायाधीशको बेन्चमा रहेका न्यायाधीशहरू सूर्य कान्त, जोयमाल्य बागची र भी. मोहनाको इजलासले यादवलाई उजुरीकर्तालाई तिर्नुपर्ने रकममध्ये २ करोड रुपैयाँ अक्टोबर १३ सम्ममा जम्मा गर्न निर्देशन दियो।
यो मुद्दा सन् २०१० मा यादवले आफ्नो चलचित्र ‘अता पता लापता’ का लागि ‘मेसर्स मुरली प्रोजेक्ट्स प्रालि’ बाट लिएको भनिएको करिब ५ करोड रुपैयाँ ऋणसँग सम्बन्धित छ। त्यसपछि ऋण चुक्ता गर्न दिइएका १ करोड ५ लाख रुपैयाँका सातवटा चेकहरू अनादर भए, जसले गर्दा ‘चेक बाउन्स’ सम्बन्धी कानुनी प्रक्रिया सुरु भयो। समय बित्दै जाँदा ब्याज र अन्य शुल्कहरू थपिँदै गएपछि तिर्न बाँकी रकम अझ बढ्यो।
अक्टोबर ५ मा, २ करोड रुपैयाँ जम्मा गर्ने अघिल्लो निर्देशन पालना गर्न असफल भएकोमा अदालतले यादवको कडा आलोचना गरेको थियो। सेप्टेम्बर १५ मा, अदालतले उनलाई रकम जम्मा गर्न र ऋण चुक्ता गर्ने ठोस योजना पेस गर्न दुई हप्ताको अन्तिम मौका दिएको थियो।
