काठमाडौं । इजरायल र हमासबीचको युद्धविराम सम्झौताको तेस्रो दिन इजरायलले ३९ प्यालेस्टिनी बन्दीलाई रिहा गरेको छ । जबकि हमासले १३ इजरायलीलाई रिहा गरेको छ । जसमा ४ वर्षकी अनाथ बालिका पनि छिन् ।
बालिकाको नाम अविगेल एडन हो। अविगेलका आमाबुबा अक्टोबर ७ मा हमासको आक्रमणमा मारिएका थिए। अविगेललाई हमास लडाकुहरूले छिमेकीको घरबाट अपहरण गरेका थिए। आइतवार राति इजरायल फर्किंदा उनका आमाबुवा उनलाई लिन त्यहाँ थिएनन्।
अमेरिकी मिडिया हाउस सीएनएनको रिपोर्ट अनुसार धेरै कैदीहरूले हमासले उनीहरूलाई भोकै राखेको बताएका छन्। दिनहुँ खानेकुरा दिइएन र जे दिइयो त्यो पर्याप्त थिएन । उचित खाना नपाउँदा कैयौं बन्धकको तौल ५ किलोसम्म घटेको छ । यद्यपि, रिहा गरिएका बन्धकहरूमा कुनै चोटपटक देखिएको छैन र इजरायलले उनीहरूलाई स्वस्थ घोषित गरेको छ।
योसँगै इजरायल र हमासबीचको युद्धविरामको अवधि पनि बढ्न सक्छ । यसका लागि अमेरिका, इजिप्ट र कतारले इजरायललाई दबाब दिइरहेका छन् ।
अर्कोतर्फ वेस्ट बैंकमा बसोबास गर्ने इजरायलीहरुले प्यालेस्टिनीहरुको जग्गा खोसेर कब्जा गरिरहेका छन् । अल जजिराको रिपोर्ट अनुसार प्यालेस्टिनीहरुको घर जलाइएको छ । त्यहाँ हिंसा भइरहेको छ। जेनिन नजिकै बस्ने एक व्यक्तिले इजरायलीहरूले आफ्नो क्षेत्रमा गाईवस्तु छाड्ने गरेको बताए। निशस्त्र रहँदा उनीहरूले सशस्त्र इजरायलीहरूको सामना गर्नुपरेको छ।
युद्धपछि इजरायली सेनाले वेस्ट बैंकमा आक्रमण गरिरहेको छ। यसैबीच त्यहाँ बस्ने इजरायलीहरूले प्यालेस्टिनीहरूलाई कुटपिट पनि गरिरहेका छन्। आक्रमणले मानिसहरू र सैनिकहरू बीच झडप निम्त्यायो। जसमा वेस्ट बैंकमा बस्ने २३७ प्यालेस्टाइनीको मृत्यु भएको छ । २८०० भन्दा बढी व्यक्ति घाइते भएका छन्।
