काठमाडौँ । वीर अस्पतालको निर्देशकको जिम्मेवारी खोसिएपछि डा सन्तोष पौडेलले स्वास्थ्य मन्त्री मोहन बस्नेतसँग आक्रोश पोखेका छन् । उनले आफूलाई निर्देशकबाट हटाएर राणा शासन भन्दा कडा अधिनायकवाद लादिएको टिप्पणी गरेका छन् ।
उनले बस्नेतको हर्कतबाट लोकतन्त्र नै लजाएको सामाजिक सञ्जालमा उल्लेख गरेका छन् ।
‘यो राणा शासन भन्दा कडा अधिनायकवाद हो ’ विधिको शासनको रट लगाएर नथाक्ने नेपाली कांग्रेसका मन्त्रीको यो हर्कतबाट “लोकतन्त्र लजाएको छ”,’ उनले सामाजिक सञ्जालमा भनेका छन्, ‘अधिनायक तत्कालीन राजा ज्ञानेन्द्र शाहले शेर बहादुर देउवालाई प्रमबाट हटाउँदा ‘निर्वाचन गराउन नसकेको, ‘अक्षम’ भन्ने आरोप लगाएर हटाएको इतिहास छ । दुई वर्षको अवधि तोकी नियुक्ति पाएको मलाई त राजनीतिक आस्थाका आधारमा निर्देशकबाट हटाएको मात्र हैन हाडजोर्नीको विशेषज्ञ सर्जनलाई मन्त्रालयमा तानियो ।’
