कैलाली । कैलालीको अत्तरिया बजारमा रहेको दोहरी साँझमा कुटपिटमा परि एक जनाको ज्यान गएको छ । २५ गते बुधबार राति कुटपिटमा परेका कञ्चनपुरको कृष्णपुर नगरपालिका वडा नम्बर ५ गुलरियाका ४२ वर्षीय श्याम देउवाको मृत्यु भएको हो ।
२५ गते राति दोहरी साँझमा कुटपिटमा परेका देउवालाई परिवारका सदस्यले राति नै उपचारका लागि धनगढी स्थित निसर्ग हस्पिटलमा ल्याएका थिए । गम्भीर चोट लागेका उनको उपचारकै क्रममा अस्पतालमा मृत्यु भएको हो ।
देउवाको ज्यान गएपछि उनको परिवारले इलाका प्रहरी कार्यालय मालाखेतीमा जाहेरी दिएको थियो । कैलाली प्रहरीले घटनाको अनुसन्धान भइरहेको जनाएको छ । अनुसन्धानका लागि शनिबारसम्म ६ जनालाई नियन्त्रणमा लिएको प्रहरीले जनाएको छ ।
