काठमाडौं । जिल्ला अदालत काठमाडौंबाट १० हजार धरौटीमा रिहा भएका गुण्डा नाइके युवराज गुरुङ उर्फ सानुभाइविरुद्ध फेरि प्रहरीमा जाहेरी परेको छ ।
शनिबार राति ठमेलस्थित छायाँ सेन्टरको पार्किङ लटमा गुरुङसहितको समूहले एक पुरूषमाथि कुटपिट गरेपछि सानुभाइसहित ७ जनाविरुद्ध प्रहरी वृत्त दरबारमार्गमा ज्यान मार्ने उद्योगको कसुरमा किटानी जाहेरी परेको हो ।
कुटपिट भइरहेको सिसीटिभी फुटेज पनि सार्वजनिक भएको छ। प्रहरी वृत्त दरबारमार्गमा सानुभाइसहित ६ जनाविरूद्ध पीडितले जाहेरी दिएका छन्। प्रहरीले उनको नाम खुलाएको छैन।
कुट्ने र कुटिने समूहका व्यक्तिहरु दुवै प्लेब्वाई नामक डिस्कोबाट छाया सेन्टरसम्म पुगेका थिए । उनीहरूबीच के विषयमा विवाद भएर कुटपिट भएको भन्ने खुलेको छैन।
ठमेलको क्लब ओम्नियाका सञ्चालकलाई १५ असारमा कुटपिट गरेको आरोपमा पक्राउ परेका बेला प्रहरीले सानुभाइलाई हत्कडीसहित ठमेलमा घुमाएको थियो ।
क्लब ओम्नियाका सञ्चालक गुरुङलाई कुटपिट गरेपछि पक्राउ परेका सानुभाइलाई जिल्ला अदालत काठमाडौंका न्यायाधीश प्रकाशप्रसाद पन्डितको इजलासले साउन १० गते १० हजार धरौटीमा छाड्ने आदेश दिएका थिए।
